ამ გადაწყვეტილებაზე სპეკულაცია არ ღირს, - ამის შესახებ პარლამენტის ვიცე-სპიკერმა გია ვოლსკიმ ჟურნალისტებს პლენარული სხდომის დასრულების შემდეგ განუცხადა, რითაც გამოეხმაურა პარლამენტის მიერ ნიკა მელიას დაპატიმრებაზე პროკურატურისთვის თანხმობის მიცემის საკითხის მხარდაჭერას.

„პარლამენტმა ნიკანორ მელია ჩააყენა იგივე მდგომარეობაში, რაც ნებისმიერი მოქალაქის მდგომარეობა იქნებოდა, თუკი მის წინააღმდეგ ასეთი ბრალდებით საქმის წარმოებას დაიწყებდა პროკურატურა. ამაზე სპეკულაცია არ ღირს,“ - განაცხადა გია ვოლსკიმ.

პარლამენტმა ნიკა მელიას დაპატიმრებაზე პროკურატურისთვის თანხმობის მიცემის საკითხს მხარი დაუჭირა. აღნიშნული დადგენილება დღევანდელ პლენარულ სხდომაზე 91 ხმით, არც ერთის წინააღმდეგ მიიღეს. ამით ნიკანორ მელიას დეპუტატის იმუნიტეტი შეუჩერდა.