ვწუხვარ, თუკი უხერხულობა შევუქმენი ჩემს კოლეგებს, მაგრამ გადაწყვეტილებას არ შევცვლი, არ შევცვლიდი, თუნდაც ყოფილიყო დამატებითი კონსულტაციები, - ამის შესახებ უმრავლესობის სხდომის დაწყებამდე, ჟურნალისტებს დეპუტატმა მარიამ ჯაშმა განუცხადა.

მმართველი გუნდის დეპუტატი იმედოვნებს, რომ კოლეგებთან პოზიციებს დაახლოებს და დეტალურად გააცნობს მისი გადაწყვეტილების მიზეზს, რის გამოც ნიკა მელიასთვის იმუნიტეტის მოხსნას მხარი არ დაუჭირა.

“მთავარია, რომ გაიმართოს გუნდის შიგნით ძალიან მნიშვნელოვანი მსჯელობა. ბუნებრივია, მე ჩემს პოზიციებს უფრო დეტალურად გავაცნობ ჩემს კოლეგებს და მეგობრებს და მე დიდი იმედი მაქვს, რომ ჩვენს პოზიციებს დავაახლოებთ. როდესაც ჩვენ გვქონდა უმრავლესობის ფორმატში განხილვა აღნიშნული საკითხის, შეთანხმება იყო, რომ მყარი მტკიცებულების წარმოდგენის შემთხვევაში გვექმებოდა თუ არა თამხმობის პოზიცია. ბუნებრივია, მყარი მტკიცებულების შემთხვევაში მეც იგივე გადაწყვეტილებას მივიღებდი. მოდით, ჩავთვალოთ, რომ მე მაქვს ნაკლები გამოცდილება იურისპუდენციაში და სამართალწარმოებაში და რამდენადაც ვიხილავდით საკმაოდ სენსიტიურ საკითხს ჩვენი კოლეგის, განსაკუთრებით პოლიტიკური ოპონენტის იმუნიტეტის შეჩერების საკითხს, მე ჩავთვალე, რომ ყველაზე სწორი გადაწყვეტილება იმ მომენტისთვის იქნებოდა თავშეკავება. ჩემი მოლოდინი იყო, რომ მოხდებოდა დამატებითი მასალების გადაცემა. სამწუხაროდ, ჩვენ არმოგვეცა დამატებითი მასალების განხილვის შესაძლებლობა პლენარულ სხომაზე და ამდენად კომიტეტების ფორმატში განხილული ინფორმაციის საფუძველზე მე თავი შევიკავე. ბუნებრივია, გუნდს აქვს თავისი წესები, მე უბრალოდ არ მომეცა საშუალება შეზღუდული დროის ფორმატიდან გამომდინარე, კენჭისყრამდე უმრავლესობის ფორმატში ჩემი განსხვავებული აზრი დამეფიქსირებინა და სწორედ ამიტომ საბოლოო ჯამში, ჩვენ ვღებულობთ ინდივიდუალურ გადაწყვეტილებას. არავითარი ზეწოლა არ არსებობს. დარწმუნებული ვარ ჩემი გადაწყვეტილების სისწორეში. ვწუხვარ, თუკი უხერხულობა შევუქმენი ჩემს კოლეგებს, მაგრამ გადაწყვეტილებას არ შევცვლი, არ შევცვლიდი, თუნდაც ყოფილიყო დამატებითი კონსულტაციები“, - აღნიშნა მარიამ ჯაშმა.

შეგახსენებთ, რომ უმრავლესობის წევრმა 4-მა დეპუტატმა - მარიამ ჯაშმა, რომან კაკულიამ, ბიძინა გეგიძემ და ალექსანდრე ერქვანიამ ნიკა მელიასთავის სადეპუტატო იმუნიტეტის შეჩერების საკითხზე კენჭისყრაში მონაწილეობა არ მიიღეს. მმართველი გუნდის წევრები გეგმავენ, აღნიშნული პირების განსხვავებულ პოზიციასთან დაკავშირებით უმრავლესობის სხდომაზე მათგან განმარტებები მოისმინონ. უმრავლესობის სხდომა "ქართული ოცნების" ოფისში ამ წუთებში მიმდინარეობს.