არ აქვს მნიშვნელობა, მინისტრია თუ დეპუტატი, ვინც დააშავა პასუხი უნდა აგოს, - ამის შესახებ ადამიანის უფლებათა დაცვის კომიტეტის თავმჯდომარე სოფო კილაძემ ჟურნალისტებს განუცხადა. ამით კილაძე 20 ივნისის ღამეს და კონკრეტული პირების პასუხისმგებლობის საკითხს გამოეხმაურა.
მისი თქმით, თუ ქვეყანას სურს, რომ განვითარდეს, როგორც დემოკრატიული და სამართლებრივი სახელმწიფო, აუცილებლად უნდა დადგეს სამართლებრივი პასუხისმგებლობის საკითხი იმ კონკრეტული პირების, რომლებმაც 20 ივნისის ღამეს დანაშაული ჩაიდინეს. კილაძის განმარტებით, ოპოზიცია აღნიშნული საკითხებით სპეკულირებს.
„თუ ვინმეს აქვს იმის მტკიცებულება, რომ ბატონმა გახარიამ რაიმე უკანონო ბრძანება გასცა, კი ბატონო, შეიძლება დადგეს პასუხისმგებლობის საკითხი, მაგრამ არ აქვს არც ოპოზიციას და არც სხვას ამის დამადასტურებელი მტკიცებულება.
სამწუხაროა, რომ ოპოზიცია სპეკულირებს ამ საკითხით, რადგან არ აქვს მნიშვნელობა მინისტრია თუ დეპუტატი, ვინც დააშავა, პასუხი უნდა აგოს. თუმცა, თუ სამართლებრივ სახელმწიფოს ვაშენებთ, მაშინ აუცილებელია თითოეულ ადამიანს მოვექცეთ ისე, როგორც ამას სამართლებრივი სახელმწიფოს სტანდარტები ითვალისწინებს," - განაცხადა სოფო კილაძემ.