ჟენევის დისკუსიებზე ოკუპირებული ცხინვალის წარმომადგენლებმა საქართველოს ხელისუფლებას ბრალი დასდეს იმაში, რომ წინასწარგანზრახულად ეწევა საერთაშორისო საზოგადოების დეზინფორმაციას „რესპუბლიკაში“ შექმნილი მდგომარეობის თაობაზე.

ოსური მედიის ინფორმაციით, ისინი აცხადებენ, რომ წარადგინეს ფაქტობრივი მასალა, რომელიც საქართველოს პოზიციას უარყოფს.

ცხინვალის დე ფაქტო ხელისუფლების წარმომადგენლებმა განაცხადეს, რომ „საქართველოს მოქალაქეები ხშირად და მიზანმიმართულად არღვევენ „სამხრეთ ოსეთის“ საზღვარს, ხოლო საქართველოს ხელისუფლება უგულებელყოფს მათ წინადადებებს საზღვრის ერთობლივი დელიმიტაცია-დემარკაციის შესახებ“.

მათ ასევე გააპროტესტეს საქართველოს მხრიდან ტერმინის „ოკუპირებული ტერიტორიები“ გამოყენება.