20-21 ივნისის მოვლენებისას ჯგუფურ ძალადობაში მონაწილეობის ბრალდებით დაკავებული ბესიკ თამლიანი ბრალს არ აღიარებს. როგორც მისმა ადვოკატმა ვახტანგ იაშვილმა ჟურნალისტებს განუცხადა, ქმედება, რომელიც კადრებში ჩანს, სისხლის სამართლის დანაშაულის ნიშნებს არ შეიაცავს.
ადვოკატი ასევე აღნიშნავს, რომ ამ ქმედებისთვის თამლიანმა პასუხი ადმინისტრაციული წესით უკვე აგო.
"დაკავებული თავს დამნაშავედ არ ცნობს, იმიტომ, რომ მსგავს ქმედებას ადგილი არ ჰქონია, რომელიც შეიძლება დაკვალიფიცირდეს 225-ე ან მსგავსი მუხლებით. ჩვენ ვნახეთ კადრები. იქ ჩანს, რომ ხელებით ურტყამს სპეცრაზმელის ფარს ორჯერ ან სამჯერ. თუმცა ამ ქმედებისთვის პატიმრობაში იმყოფებოდა და პასუხი აგო ადმინისტრაციული წესით და მაშინ ეს არ დაკვალიფიცირდა სისხლის სამართლებრივად და მეორე - იმთავითვე შეგვიძლია ვთქვათ, რომ ეს ქმედება, რომელზეც ჩვენ ვსაუბრობთ, არ შეიცავს სისხლის სამართლის კოდექსით გათვალისწინებული დანაშაულის ნიშნებს და აქედან გამომდინარე, ბრალდება სრულიად უსაფუძვლოა, რა მტკიცებულებაც არ უნდა წარმოადგინონ და ვერც წარმოადგენენ მტკიცებულებას", - განაცხადა ვახტანგ იაშვილმა.
ამასთან, როგორც ადვოკატი აღნიშნავს, საზოგადოება ნახავს, თუ რა გახდა მისი დაცვის ქვეშ მყოფისა და სხვა პირების დაკავების მიზეზი.
"იმის გათვალისწინებით, რაც ხდება ჩვენს ქვეყანაში უკანასკნელი პერიოდის განმავლობაში, კერძოდ ის, რომ დაასახიჩრეს ბავშვები და ახალგაზრდები, თვალები დათხარეს, ჩვენ ვერ ვხედავთ ვერც ერთ პასუხისმგებელ პირს, რომელიც ამისათვის მიეცემოდა სისხლის სამართლის პასუხისგებაში. პირიქით, მთავრობა ცდილობს ყველანაირად გაამართლოს როგორც პოლიციელები, ასევე ის პირები ვინც გასცა ბრძანება, მოქალაქეების დასახიჩრების თაობაზე. ვფიქრობ, ეს პროცესი ასე არ დამთავრდება და საზოგადოებისვთის გახდება ცნობილი რეალური საფუძვლები და გარემოებები, რაც გახდა მიზეზი ჩემი დაცვის ქვეშ მყოფის და სხვა პირების პასუხისმგებლობის", - განაცხადა იაშვილმა.