ვცდილობთ, გარკვეულწილად მივაღწიოთ ამ საქმის დახურვას და იმას, რომ თამარ მეარაყიშვილი არ იყოს საოკუპაციო ძალების მხრიდან ზეწოლის ქვეშ, - ამის შესახებ საგარეო საქმეთა მინისტრის მოადგილემ ლაშა დარსალიამ ჟურნალისტებს ახალგორელი აქტივისტის თამარ მეარაყიშვილის საქმის კომენტირებისას განუცხადა. დარსალიას შეფასებით, ეს საქმე კიდევ ერთი ნათელი მაგალითია საოკუპაციო ძალების მიერ ადამიანის უფლებების დარღვევის.

„ცალსახად ეს კიდევ ერთი მაგალითია ადამიანის უფლებების დარღვევის. ეს არის მაგალითი იმისა, თუ რა ტერორის ქვეშ ჰყავთ საოკუპაციო ძალებს ადამიანები. ამ საკითხებს ჩვენ სხვადასხვა ფორმატებში ვაყენებთ და ვცდილობთ გარკვეულწილად მივაღწიოთ ამ ქეისის დახურვას და იმას, რომ თამარ მეარაყიშვილი არ იყოს საოკუპაციო ძალების მხრიდან ზეწოლის ქვეშ. კონკრეტულ ნაბიჯებზე, რომელსაც ჩვენ ვდგამთ და დეტალებზე საუბრისგან თავს შევიკავებ, იქიდან გამომდინარე, რომ საუბარია კონკრეტული ადამიანის ბედზე, რომელიც ოკუპირებულ ტერიტორიაზე იმყოფება“, - განაცხადა ლაშა დარსალიამ.

სამოქალაქო აქტივისტის თამარ მეარაყიშვილის წინააღმდეგ ოკუპირებული ცხინვალის რეგიონის დე ფაქტო მთავრობას სისხლის სამართლის საქმე აქვს აღძრული. აქტივისტი თავდაპირველად პატიმრობაში იმყოფებოდა, თუმცა მოგვიანებით გაათავისუფლეს. მეარაყიშვილის წინააღმდეგ სისხლის სამართლებრივი დევნა არ შეწყვეტილა და მის საქმეს ცხინვალის ე.წ. სასამართლო განიხილავს.