უკრაინის პრეზიდენტმა ვლადიმირ ზელენსკიმ რუსეთის პრეზიდენტს ვლადიმირ პუტინს მწვავე საკითხების განსახილველად შეხვედრა შესთავაზა.
„ინსტაგრამზე“ გავრცელებულ ვიდეომიმართვაში ზელენსკი პუტინს შეხვედრას კვლავ მინსკში სთავაზობს, ოღონდ ახალ ფორმატში - აშშ პრეზიდენტის, დიდი ბრიტანეთის პრემიერ-მინისტრის, გერმანიის კანცლერისა და საფრანგეთის პრეზიდენტის მონაწილეობით.
ამ შეთავაზებას უკვე მოჰყვა პასუხი კრემლიდან. პრეზიდენტ პუტინის პრესმდივანმა დიმიტრი პესკოვმა განაცხადა, რომ ჯერ მზად არ არის კონკრეტული პასუხის გასაცემად და რუსეთის პრეზიდენტის ადმინისტრაცია აუცილებლად შეისწავლის ამ წინადადებას. პესკოვმა აღნიშნა, რომ ეს არის ახალი ფორმატი, რადგან აშშ-ის პრეზიდენტი არ მონაწილეობდა „ნორმანდიის ფორმატში“, რის ჩარჩოებშიც მოეწერა ხელი მინსკის ხელშეკრულებას. პესკოვის თქმით, ჯერ უნდა გაანალიზდეს, რამდენად აქვს პერსპექტივა ამ ახალ ფორმატს.