სომალის სამხრეთში მდებარე საპორტო ქალაქ კისმაიიუში, სასტუმროზე ტერორისტების თავდასხმის შედეგად, 14 ადამიანი დაიღუპა. მძიმედ დაშავებულია რამდენიმე ადამიანი. თავდასხმა ტერორისტული დაჯგუფება „აშ-შაბაბის“ ტერორისტებმა განახორციელეს.
სასტუმროში, სადაც ტერაქტი მოხდა, შეხვედრა მიმდინარეობდა, სადაც მოახლოებულ ადგილობრივ არჩევნებზე მსჯელობდნენ. შეხვედრაში მონაწილეობდნენ ადგილობრივი უხუცესები, არჩევნებში მონაწილე კანდიდატები და ჟურნალისტები. სასტუმროს ასაფეთქებელი მოწყობილობით დატვირთული მანქანა დაეჯახა და შემდეგ სროლა ატყდა. პოლიციასთან ორმხრივი სროლა რამდენიმე საათის განმავლობაში გრძელდებოდა.მოკლულია 4 ტერორისტიც.
დაღუპულებს შორის ორი ჟურნალისტია: სომალელ-კანადელი ჟურნალისტი, „Integration TV“-ს დამფუძნებელი ჰოდან ნალეიაჰი და „SBC TV“-ს რეპორტიორი მოჰამედ საჰალ ომარი. დაღუპულებს შორის არიან არჩევნებში მონაწილე კანდიდატებიც.
ისლამისტური დაჯგუფება „აშ-შაბაბი“ სომალის დედაქალაქ მოგადიშოდან 2011 წელს განდევნეს, 2012 წელს კი, ქალაქი კისმაიიუდან, რასაც ისინი დღემდე ვერ ეგუებიან. ეს ტერორისტული დაჯგუფება დღემდე რჩება სომალის უსაფრთხოების მთავარ გამოწვევად, რადგან ისინი ხშირად აწყობენ ტერაქტებს სომალიშიც და მეზობელ კენიაშიც.
ამ ინფორმაციას „როიტერი“ ავრცელებს.