სამართლიანობის აღდგენა იმისთვის გვჭირდება, რომ არასდროს არ ვიყოთ, შინაგანად მაინც, რაღაცნაირად გარკვეულწილად ვალში, ვიღაც ადამიანის მიმართ, - ამის შესახებ „რუსთავი 2“-ის ერთ-ერთმა დამფუძნებელმა ჯარჯი აქიმიძემ პარლამენტში განაცხადა, სადაც რამდენიმე დპუტატის მოწვევით „რუსთავი 2“-ის საქმეზე მოსმენა მიმდინარეობს. როგორც აქიმიძემ აღნიშნა, ის და დავით დვალი აუცილებლად გამოიყენებენ ყველა სამართლებრივ გზას, რათა საკუთარი ბრძოლა გამარჯვებამდე მიიყვანონ.
„ჩვენ გვინდა მხოლოდ და მხოლოდ სამართლებრივად დავიბრუნოთ ეს ყველაფერი. რა მოლაპარაკებებიც არ უნდა შედგეს, რაც არ უნდა შევთანხმდეთ, როგორც არ უნდა შევიდეთ ტელევიზიაში, ჩვენ მოვითხოვთ სამართლიანობის აღდგენას და იმის აღიარებას, რომ სახელმწიფომ თავის დროზე ჩვენს წინაშე ჩაიდინა დანაშაული. ეს ყველაფერი გვჭირდება იმისთვის, რომ ერთხელ და სამუდამოდ აღდგეს ჩვენს წინაშე სამართლიანობა და მეორე - რომ ჩვენ არასოდეს არ ვიყოთ შინაგანად მაინც, რაღაცნაირად გარკვეულწილად ვალში, ვიღაც ადამიანის მიმართ, რომელიც შეიძლება ძალიან კეთილი და კარგი იყოს, მაგრამ მასაც არ უნდა ჰქონდეს ცდუნება, რომ რაღაც გარკვეული პრეტენზია გაუჩნდება ჩვენს მიმართ“, - განაცხადა ჯარჯი აქიმიძემ.