რუსი ოპოზიციონერი, ალექსეი ნავალნი, რომელსაც რამდენიმე დღის წინ ერთთვიანი პატიმრობა მიესაჯა, ციხიდან საავადმყოფოში გადაიყვანეს. მისი პრესსპიკერის განცხადებით, ამის მიზეზი ალერგიული რეაქცია გახდა. მისივე თქმით, ნავალნის სახე გაუწითლდა და დაუსივდა. ოპოზიციონერის პრესსპიკერი აცხადებს, რომ უცნობია, თუ რამ გამოიწვია ალერგიული რეაქცია. მისივე ინფორმაციით, მსგავსი რამ ადრე მას არასოდეს მოსვლია.
შეგახსენებთ, რომ ნავალნი, არასანქცირებული საპროტესტო აქციების გამართვის მოწოდების გამო დააკავეს. საპროტესტო აქციის გამართვას ნავალნი მოსკოვის სათათბიროს არჩევნებში ოპოზიციონერი კანდიდატებისთვის დარეგისტრირებაზე უარის თქმის გამო გეგმავდა. აღსანიშნავია, რომ ნავალნი ბოლო წლების განმავლობაში არაერთხელ დაუკავებიათ. ევროპულმა სასამართლომ გასულ წელს, 2012 და 2014 წლებში, ნავალნის დაკავებას პოლიტიკურად მოტივირებული უწოდა.