20-21 ივნისის მოვლენებთან დაკავშირებით დაკავებული ბესიკ თამლიანის დედა, რუსუდან თამლიანი აცხადებს, რომ მას თავის შვილთან კომუნიკაცია შეზღუდული აქვს და მისი ნახვის უფლებას არ აძლევენ.

როგორც რუსუდან თამლიანმა გლდანის ციხესთან ჟურნალისტებს განუცხადა, მას პირველ რიგში, თავისი შვილის ჯანმრთელობის მდგომარეობა აინტერესებს, რადგან, მისი თქმით, დაკავებისას ის ნაცემი იყო.

რუსუდან თამლიანს იმედი აქვს, რომ „ევროპული საქართველოს" წევრი, დეპუტატი ელენე ხოშტარია, რომელიც გლდანის ციხეში, 20-21 ივნისის მოვლენებთან დაკავშირებით დაკავებულების მოსანახულებლად იმყოფება, მისი შვილის ჯანმრთელობის მდგომარეობის შესახებ ინფორმაციას მიაწვდის.

„ტელეფონზე დარეკვის უფლება არ აქვს. ყველაფერი აუკრძალეს. არაფერი არ ვიცი მის შესახებ. ერთადერთი იმედია ელენე ხოშტარია, რომ გამოვა და გამოგვიტანს ინფორმაციას.

ბორკილებდადებული უმოწყალოდ სცემეს, მუხლები სტკიოდა, რომ შეიყვანეს. თვალიც დაზიანებული აქვს. პოლიტიკური რეპრესიაა, სხვა ამას არაფერი ეთქმის. სადამსჯელო ოპერაცია ჩაატარა გახარიამ", - განაცხადა რუსუდან თამლიანმა.