ნატო-ს F-18 ტიპის გამანადგურებელი, რომელიც გუშინ რუსეთის თავდაცვის მინისტრის თვითმფრინავთან მიახლოებას შეეცადა, ესპანეთის საჰაერო ძალების კუთვნილებაა, - ამის შესახებ რუსულ საინფორმაციო სააგენტო Tass-ს ესპანეთის თავდაცვის სამინისტროში განუცხადეს.
„ვიდეოში ნაჩვენები გამანადგურებელი ესპანურია და ის ნატო-ს კონტროლის ქვეშ იმყოფება,“ - განაცხადა სამინისტროს პრესსპიკერმა.
გუშინ რუსულმა მედიამ გაავრცელა ინფორმაცია, რომ ალიანსის F-18 ტიპის გამანადგურებელმა ბალტიის ზღვის თავზე რუსეთის თავდაცვის მინისტრის სერგეი შოიგუს თვითმფრინავთან მიახლოება სცადა, თუმცა ამის საშუალება მას რუსულმა გამანადგურებელმა არ მისცა. მოგვიანებით, ნატო-ში განმარტეს, რომ გამანადგურებელი თვითმფრინავს იდენტიფიცირების მიზნით მიუახლოვდა.