გორის მუნიციპალიტეტში, გამყოფ ხაზთან მდებარე სოფელ გუგუტიანთკართან, სადაც რუსული საჯარისო დანაყოფის წარმომადგენლები მეორე დღეა აქტიურად აგრძელებენ ე.წ. ბორდერიზაციის პროცესს, "ევროპული საქართველოს" ერთ-ერთი ლიდერი ელენე ხოშტარია ჩავიდა.
დეპუტატმა ე.წ საზღვრის მიმდებარე ტერიტორია დაათვალიერა, სადაც საოკუპაციო ძალების წარმომადგენლები დამატებითად ამომტაჟებენ ლითონის კონსტრუქციებს.
"ამ ფონზე, როდესაც ჩვენ ვხედავთ სახელმწიფოს მიერ დაკვეთილ ფილმს რუსული "ოერტე-ს" ნარატივით, ეს არის ჩვენთვის კატასტროფა. რუსეთი ისედაც ყოველთვის იყო მომაკვდინებელი და მომავალშიც დარჩება. მთავარია ჩვენი ხელოსუფლება რას აკეთებს ამისთვის. აქ დღეს უნდა იდგეს მთელი მთავრობა, განსაკუთრებით საგარეო საქმეთა მინისტრი დავით ზალკალიანი დიპლომატიურ კორპუსთან ერთად და მთელ მსოფლიოს აგონებდეს 21-ე საუკუნეში რუსეთი როგორ სასტიკად იქცევა და გლეჯს მიწებს. ასევე დაუშვებელია, რომ ასეთი მკვლელი ქვეყნის დეპუტატი გვეჯდეს პარლამენტის თავმჯდომარის სკამში," - განაცხადა ელენე ხოშტარიამ.
შეგახსენებთ, რომ გორის მუნიციპალიტეტში, გამყოფ ხაზთან მდებარე სოფელ გუგუტიანთკართან, რუსული საჯარისო დანაყოფის წარმომადგენლები მეორე დღეა, აქტიურად აგრძელებენ ე.წ. ბორდერიზაციის პროცესს.
ადგილობრივი მცხოვრებლების თქმით, ერთი კვირის წინ განთავსებული ბოძების გარდა, საოკუპაციო ძალების წარმომადგენლები დილიდან დამატებით ამონტაჟებენ ლითონის კონსტრუქციებს, რომლებზეც ე.წ. სასაზღვრო ბადეებს ამაგრებენ.