სახალხო დამცველი ნინო ლომჯარია სოფელ გუგუტიანთკარში იმყოფება და მიმდინარე პროცესებს აკვირდება.
„2019 წლის 7 აგვისტოს სოფელ გუგუტიანთკართან საოკუპაციო ძალების მიერ ეგრეთ წოდებული ხელოვნური ბარიერების აღმართვის უკანონო პროცესი დაიწყო, რომელიც დღემდე მიმდინარეობს.
სახალხო დამცველი მიმართავს საქართველოს ხელისუფლებას, საერთაშორისო თანამეგობრობასთან მჭიდრო თანამშრომლობით, ქმედითი ნაბიჯები გადადგას, რათა თავიდან იქნას აცილებული მოსახლეობის თავისუფალი გადაადგილების უფლების შეზღუდვა და სასოფლო-სამეურნეო დანიშნულების მიწის ნაკვეთების დაკარგვა, რაც იქ მცხოვრები მოსახლეობისთვის შემოსავლის ძირითად წყაროს წარმოადგენს. ასევე მოუწოდებს სამართალდამცველ ორგანოებს, განსაკუთრებული ყურადღება გაამახვილონ მიმდებარე ტერიტორიაზე მცხოვრები მოსახლეობის უსაფრთხოების დასაცავად",-აღნიშნულია ინფორმაციაში, რომელიც ომბუდსმენის „ფეისბუქის“ ოფიციალურ გვერდზე ვრცელდება.