გამყოფ ხაზთან მდებარე სოფელ ახალუბანთან დაკავებული 8 პირი კვლავ ცხინვალის მილიციის იზოლატორში რჩება. მათი ახლობლების ვარაუდით, ე.წ. სასამართლო პროცესი ცხინვალში დღეს უნდა გამართულიყო, თუმცა, დაზუსტებული ინფორმაციის მიღებას ვერ ახერხებენ, კვლავ შეუძლებელია დაკავებულებთან სატელეფონო კომუნიკაციაც.

ე.წ. საზღვრის უკანონოდ გადაკვეთის ბრალდებით დაკავებული ერთ-ერთი მამაკაცის ნათესავი „ინტერპრესნიუსთან“ აცხადებს, რომ დეტალების გარკვევა ცხინვალში მცხოვრებ ნათესავებს სთხოვეს, თუმცა, გათავისუფლების დეტალებთან დაკავშირებით დაზუსტებული ინფორმაციის მოპოვება ვერც მათ შეძლეს.

ცხინვალის იზოლატორში სულ საქართველოს 8 მოქალაქე იმყოფება, რომლებიც საოკუპაციო ძალებმა სოფელ ახალუბანთან დააკავეს. ცხინვალის დე ფაქტო ხელისუფლების ინფორმაციით, ისინი ე.წ. საზღვრის უკანონო გადაკვეთის ბრალდებით დააკავეს.