შიდა ქართლის გუბერნატორი - გამყოფ ხაზთან მიმდინარე პროცესი კიდევ ერთხელ ადასტურებს, რომ რუსეთი ოკუპანტია
გორის მუნიციპალიტეტში, სოფელ გუგუტიანთკარის განაპირას, გამყოფ ხაზთან შიდა ქართლის გუბერნატორი იმყოფება. გიორგი ხოჯევანიშვილი ადგილობრივ მოსახლეობას შეხვდა და ასევე ევროკავშირის სადამკვირვებლო მისიის მონიტორებს ესაუბრა.
შიდა ქართლის გუბერნატორის განცხადებით, საქართველოს მთავრობა საოკუპაციო ხაზთან არსებული ვითარების შესაჩერებლად, მის ხელთ არსებულ ყველა ბერკეტს იყენებს.
„ჩვენ ინტენსიურ რეჟიმში ვხვდებით მოსახლეობას და ვაწვდით ყველა ინფორმაციას, რაც მათ ინტერესებში შედის. გამყოფ ხაზთან მიმდინარე პროცესი კიდევ ერთხელ ადასტურებს, რომ რუსეთი ოკუპანტია და საოკუპაციო პოლიტიკას აგრძელებს. საქართველოს მთავრობა ყველაფერს აკეთებს, იყენებს მის ხელთ არსებულ ყველა ბერკეტს, რომ შეჩერდეს ეს უკანონო პროცესი. ძალზედ მნიშვნელოვანია, ჩვენს საერთაშორისო პარტნიორებთან თანამშრომლობა და მათთვის ხდება არსებულ ვითარებაზე დეტალური ინფორმაციიის მიწოდება“, - განაცხადა შიდა ქართლის გუბერნატორმა გიორგი ხოჯევანიშვილმა.
