ცხინვალის მარიონეტული რეჟიმის ე.წ. უშიშროების კომიტეტი ქართულ მხარეს ე.წ. საზღვრისპირა რეგიონში დაძაბულობის პროვოცირებაში ადანაშაულებს.
„კომიტეტში შემოდის ინფორმაციები, რომლის თანახმად, 25 აგვისტოს დილით დასახლებულ პუნქტ სინაგურთან, საქართველოს პოლიციის ობიექტისთვის მოედნის მშენებლობა გრძელდება. სავარაუდოდ, პოლიციის პოსტი აღჭურვილი იქნება საცხოვრებელი ვაგონებით“, - განუცხადეს დე ფაქტო უწყებაში სააგენტო „რეს“-ს.
„უშიშროების კომიტეტის“ ინფორმაციით, საქართველოს ხელისუფლება აპირებს განახორციელოს იმ გზის კაპიტალური რემონტი ბეტონის საფარით, რომელიც პოლიციის პოსტს დასახლებულ პუნქტ პერევთან აკავშირებს.
„უშიშროების კომიტეტი“ აცხადებს, რომ ქართული მხარის აღნიშნული ქმედებები ატარებს პროვოკაციულ ხასიათს და ხელს არ უწყობს სტაბილურ მდგომარეობას „საზღვართან“.