აფხაზეთის დე ფაქტო ხელისუფლება ოკუპირებულ აფხაზეთში მიმდინარე „საპრეზიდენტო არჩევნებთან“ დაკავშირებით საქართველოს საგარეო საქმეთა სამინისტროს მიერ გაკეთებულ განცხადებას ეხმაურება.

სააგენტო „რია ნოვოსტისთან“ ინტერვიუში აფხაზეთის ე.წ. საგარეო საქმეთა მინისტრმა დაურ კოვემ განაცხადა, რომ „საპრეზიდენტო არჩევნები“ ყველანაირ სამართლებრივ და დემოკრატიულ ნორმასა და სტანდარტს შეესაბამება.

„საქართველოს საგარეო საქმეთა სამინისტროს ახალი არაფერი უთქვამს. ეს ისევ ის პროპაგანდისტული შტამპია, რაც მთელი ამ დროის განმავლობაში გააჩნია საქართველოს და მის მუდმივ ტირაჟირებას ახდენს. ერთადერთი, რაც ამ კონტექსტში შემიძლია ვთქვა, არჩევნები ყოველგვარ სამართლებრივ და დემოკრტაიულ ნორმებსა და სტანდარტებს შეესაბამება და მიმდინარეობს კანონმდებლობასთან სრულ შესაბამისობაში“, - განაცხადა დაურ კოვემ.

მისივე თქმით, „არჩევნებს“ ესწრებიან დიდი რაოდენობით საერთაშორისო დამკვირვებლები, მათ შორის, გერმანიიდან. მისივე განცხადებით, პროცესები, რომლებიც ოკუპირებულ აფხაზეთში მიმდინარეობს, ადასტურებს, რომ „სახელმწიფო სამართლებრივ კალაპოტში ვითარდება“.