ბრაზილიელმა მწერალმა პაულო კოელიომ ბოდიში მოიხადა ქვეყნის პრეზიდენტის, ჟაირ ბოლსონარუს საქციელის გამო, რომელმაც მკვეთრი და შეურაცხმყოფელი გამოთქმები გამოიყენა ფრანგი კოლეგის, ემანუელ მაკრონის მეუღლის, ბრიჯიტის მიმართ.

„ეს ცოტა მოსაწყენი ვიდეო გადავიღე, რომ პატიება მეთხოვა ჩემი ფრანგი მეგობრებისთვის შექმნილი კრიზისის გამო. უფრო ზუსტად ბოლსონარუს ისტერიკის გამო საფრანგეთის, საფრანგეთის პრეზიდენტის და მისი მეუღლის მიმართ. მაპატიეთ, მე მაპატიეთ...“, - განაცხადა კოელიომ „ტვიტერზე“ დადებულ ვიდეომიმართვაში.

მწერლის სიტყვებით, ბრაზილიის თავზე „წყვდიადი ჩამოწვა, რომელიც გაივლის, ისე როგორც გადის ღამე“.

თვით მაკრონმა, ბრაზილიის ხელისუფლების მიერ მასზე განხორციელებული თავდასხმების კომენტირებისას განაცხადა, რომ შეურაცხმყოფელი გამონათქვამები მასში სინანულს და მწუხარებას იწვევს. მან დასძინა, რომ „დიდ პატივს სცემს ბრაზილიელ ხალხს და ის იმსახურებს პრეზიდენტს, რომლის საქციელიც მოწოდების სიმაღლეზე იქნება“.