პირველი ოქტომბრიდან შვეიცარია საქართველოს უსაფრთხო ქვეყნად აღიარებს. ამის შესახებ შვეიცარიული გამოცემა Neue Züricher Zeitung წერს.
გამოცემის ცნობით, შვეიცარიის ფედერალურმა საბჭომ უსაფრთხო ქვეყნების სია დღეს განაახლა. ეს კი იმის მანიშნებელია, რომ შვეიცარია მიმართავს ყველა საჭირო ღონისძიებას, რათა შემცირდეს თავშესაფრის იმ მაძიებელთა რიცხვი, რომლებსაც ქვეყანაში დასარჩენად საკმარისი საფუძველი არ აქვთ. უსაფრთხო ქვეყნებიდან ჩასული თავშესაფრის მაძიებელთა საქმე დაჩქარებული წესით განიხილება და მათ წესისამებრ არ მიენიჭებათ ლტოლვილის სტატუსიც.
როგორც Neue Züricher Zeitung წერს, საქართველოდან თავშესაფრის მაძიებელთა რიცხვმა 2017 წლის შემოდგომის შემდეგ მოიმატა როგორც ევროპაში, ასევე შვეიცარიაში და ეს პირდაპირ კავშირშია ვიზალიბერალიზაციასთან. გამოცემის ცნობით, შვეიცარიამ უკვე გაატარა სხვადასხვა ღონისძიება, თუმცა თავშესაფრის უსაფუძვლოდ მაძიებელთა რიცხვი მაინც შედარებით მაღალია.
ამ მხრივ გასულ წელს, საქართველო მეხუთე ადგილზე იყო ერითრეას, ავღანეთის, სირიის და თურქეთის შემდეგ. საერთო ჯამში დაფიქსირდა 873 განაცხადი, რაც 2017 წელთან შედარებით 30 პროცენტით მეტია.
იხილეთ ვიდეო: შვეიცარია საქართველოს უსაფრთხო ქვეყნად აღიარებს - Neue Züricher Zeitung