ჩვენი ამოცანაა, პირველივე არჩევნებზე საკუთარი კაბინეტებიდან გამოვაბრძანოთ ის მავნებლები, რომლებიც მოსახლეობის დასახმარებლად არაფერს აკეთებენ, - ამის შესახებ „ევროპული საქართველოს“ ლიდერმა დავით ბაქრაძემ მარნეულის რაიონში, სოფელ ქესალოს მოსახლეობასთან შეხვედრისას განაცხადა.
როგორც ბაქრაძემ აღნიშნა, სოფელში მდებარე სარწყავი არხი მხოლოდ სოფლის რწმუნებულის ნაკვეთს ემსახურება და არა ადგილობრივებს.
„სოფელში ზამთარში შეიყვანეს ტექნიკური წყალი და ახლა გამოუცხადეს ადამიანებს, რომ თურმე ეს ტექნიკური წყალი უნდა გამოიყენონ სასმელად და ამისთვის უნდა გადაიხადონ ფული. ადამიანებს არ აქვთ სარწყავი წყალი და აქ მოსახლეობა თავს ირჩენს სწორედ სოფლის მეურნეობით და პროდუქტების მოყვანით, მათ არ აქვთ საშუალება დაამუშავონ მიწა. არის არხი, რომელიც ემსახურება მხოლოდ სოფლის რწმუნებულის ნაკვეთს და არა ადგილობრივ გლეხობას. ეს არის დღევანდელი ხელისუფლება, რომელსაც თავში აქვს ავარდნილი და დარწმუნებულია, რომ არაფერს არ გააკეთებს და ვერაფერს ვერ უზამენ. ამიტომ ჩვენი ამოცანაა, პირველივე არჩევნებზე საკუთარი კაბინეტებიდან გამოვაბრძანოთ ის მავნებლები, რომლებიც საკუთარი ჯიბის იქეთ არ იხედებიან და არაფერს არ აკეთებენ მოსახლეობის დასახმარებლად“, - განაცხადა დავით ბაქრაძემ.