ზაალ უდუმაშვილი - გიორგი გახარიას პრემიერად წარდგენა იმას ნიშნავს, რომ გავრილოვი დანიშნო საქართველოს მთავრობის მეთაურად
თუ გიორგი გახარიას პრემიერ-მინისტრად წარადგენენ, ეს იქნება ივანიშვილის რეჟიმის პირდაპირი დასასრული - გახარიას პრემიერად წარდგენა ეს იმას ნიშნავს, რომ გავრილოვი დანიშნო საქართველოს პრემიერად,- ამის შესახებ „ნაციონალური მოძრაობის“ წევრმა ზაალ უდუმაშვილმა ჟურნალისტებს განუცხადა, რითაც გამოეხმაურა შესაძლო სამთავრობო ცვლილებას.
მისი თქმით, გიორგი გახარიამ „თბილისში გავრილოვის ღამე მოაწყო და ამის შემდეგ მისი დაწინაურება პრემიერად, ეს არის საქართველოს მოსახლეობის აბუჩად აგდება".
„ბიძინა ივანიშვილი მოსწრებაზეა. ახლა ნებისმიერ ნაბიჯს დგამს, რაღაცნაირად შექმნას ფასადური შთაბეჭდილება მაინც იმისთვის, რომ რაღაცას აკეთებენ. ჯერჯერობით, რაც კომენტარებიდან დადასტურდა არის ის, რომ მამუკა ბახტაძე აღარ იქნება პრემიერ-მინისტრი. ვნახოთ, ვის წარადგენენ პრემიერად. ბიძინა ივანიშვილს დიდი არჩევანი არ აქვს, იმიტომ, რომ „ქართულ ოცნებაში" კადრების სერიოზული პრობლემაა. ვინც არ უნდა წარადგინოს პრემიერად ივანიშვილმა, ეს მას არ უშველის, რადგანაც ამ რეჟიმს გაჭირვების გარდა არაფერი მოუტანია მოსახლეობისთვის“, - განაცხადა უდუმაშვილმა.
