„სამხრეთ ოსეთი“ და ქართული მხარე უახლოეს მომავალში გააგრძელებენ მოლაპარაკებებს სოფელ წნელისთან პოლიციის ბლოკპოსტის მოხსნის შესახებ. სააგენტო „რესის“ ინფორმაციით, ამის შესახებ დე ფაქტო პრეზიდენტის წარმომადგენელმა პოსტკონფლიქტური დარეგულირების საკითხებში მურატ ჯიოევმა განაცხადა.

მისი თქმით, დღეს ერგნეთში გამართული შეხვედრა უშედეგოდ დასრულდა. თუმცა, ჯიოევის განცხადებით, ერთადერთი ძირითადი შედეგია ის, რომ მოხდა შეთანხმება უახლოეს პერიოდში დიალოგის გაგრძელებაზე.

„სავარაუდოდ, ამ კვირის ბოლოს, ან მომდევნო კვირის დასაწყისში შედგება შეხვედრა. ჩვენ ვთქვით, რომ არ არის სასურველი შეხვედრის გაჭიანურება, არამედ აუცილებელია მისი შეთანხმება ყველა მხარესთან. ევროკავშირის სადამკვირვებლო მისიის დამკვირვებლები დაიწყებენ კონსულტაციებს ყველა მხარესთან“.