20 ივნისს შეიძლება, რაღაც დონეზე იყო შეცდომები დაშვებული, ძალიან ცუდი იყო, რაც მოხდა, - ამის შესახებ შს მინისტრობის კანდიდატმა ვახტანგ გომელაურმა 20 ივნისის მოვლენებზე საუბრისას ჟურნალისტებს განუცხადა.
მისი თქმით, 20 ივნისის მოვლენების შედეგად, დაზარალდნენ როგორც მოქალაქეები, ასევე პოლიციელები, რაც ძალიან მძიმე საკითხია.
„მოხდა რაღაც გადაცდომები, რა თქმა უნდა და აქედან გამომდინარე, პასუხისგებაშიც მიეცნენ ადამიანები. პროკურატურა, სასამართლოა და მათ უნდა განსაჯონ, თუ გადაამეტა მოქალაქემ თუ პოლიციელმა, ყველა უნდა დაისაჯოს კანონის ფარგლებში,“ - აღნიშნა ვახტანგ გომელაურმა.
ამასთან, მან გიორგი გახარიას პრემიერ-მინისტრად დანიშვნის თაობაზე მიღებულ გადაწყვეტილებაზე საუბრისას, ჟურნალისტებს განუცხადა, რომ „არასწორ მისამართზე არიან“. მისი თქმით, რატომ წარადგინეს მთავრობის მეთაურად ყოფილი შს მინისტრი, არათუ მას, არამედ პარტიასთან უნდა იკითხონ.
„პასუხისმგებლობა აიღეს ადამიანებმა, ვინც ისროდა, სადაც არ უნდა ესროლა რეზინის ტყვია იყო თუ რაც მოხდა. ასე მაშინ ყველას პასუხისმგებლობა, ჩემი პასუხისმგებლობაცაა ეგ, მთელი მთავრობის პასუხისმგებლობაა ასე, მარტო გახარიას პასუხისმგებლობა რატომ უნდა იყოს? ყველა ვგრძნობთ პასუხისმგებლობას, რა თქმა უნდა, “ - განაცხადა ვახტანგ გომელაურმა.