რუსთავში, ე.წ.სტამბოლის ბაზრობაზე დასაქმებულებს ყოველდღიური გადასახადი კვლავ 3,50 ლარი დარჩებათ. ბაზრობის ადმინისტრაცია გაფიცულ თანამშრომლებთან შეხვედრის შემდეგ დათმობაზე წავიდა და გადასახადის გაზრდაზე დროებით უარი თქვა. ძველი ტარიფის დატოვებაზე შეთანხმებას, ბაზრობაზე დასაქმებულმა 300-მდე მოვაჭრემ ადმინისტრაციასთან შეხვედრის და რამდენიმესაათიანი მოლაპარაკების შემდეგ მიაღწია. მოლაპარაკებებს რუსთავის მერი ირაკლი ტაბაღუა დაესწრო, რომელიც მანამდე ბაზრობის გაფიცულ თანამშრომლებს შეხვდა და მათ მოთხოვნებს ადგილზე გაეცნო.
როგორც ბაზრობის დირექტორმა მამუკა ცხოვრებაძემ ჟურნალისტებთან საუბარში განაცხადა, ხვალიდან შეიქმნება სამუშაო ჯგუფი, რომელიც დაადგენს რა თანხის გადახდა მოუწევთ და მოემატებათ თუ არა მოვაჭრეებს გადასახადი მომავალში. მისივე განმარტებით, შპს „ერთობა“ ე.წ.სტამბოლის ბაზარი იხდის მოვაჭრეების და მათი საქონელის დაზღვევის ფულს, გადასახადი 2013 წელსაც 3,50 ლარი იყო და ბუნებრივია, 2019 წელს კვლავ 3,50 ლარი ვეღარ იქნება. ცხოვრებაძის თქმით, მოიმატა გადასახადებმა, მოვაჭრეების კომფორტისთვის გაკეთდა ბევრი რამ, რაც გარკვეულ თანხებთან იყო დაკავშირებული.
ე.წ. სტამბულის ბაზრობაზე დასაქმებული 300-მდე მოვაჭრე დილიდან გაიფიცა, ბაზრობაზე დახურული იყო ყველა სექცია. მათ საპროტესტო აქცია მოაწყვეს და ბაზრობის ადმინისტრაციის მიერ დახლზე დაწესებული ყოველდღიური გადასახადის გაზრდა გააპროტესტეს.