გაკოტრებული პოლიტიკური ორგანიზაცია ცდილობს ყურადღება მიიქციოს სწორედ ასეთი შოუების დადგმით, - ასე გამოეხმაურა თბილისის საკრებულოს თავმჯდომარის მოადგილე ირაკლი ზარქუა საკრებულოში ოპოზიციონერ დეპუტატს, ლევან ხაბეიშვილსა და თბილისის მერს შორის მომხდარ შელაპარაკებას. როგორც ზარქუამ განაცხადა, ხაბეიშვილი იტყუება, როდესაც აცხადებს, რომ ის მთავრობის სხდომაზე არ შეუშვეს და მას მხოლოდ შოუების დადგმის სურვილი აქვს.

„ესაა ოპოზიცია, რომელსაც იმ პროექტებზე და პროგრამებზე, რომელსაც მერიის და საკრებულოს ინიციატივით ვახორციელებთ, არც ერთხელ ხელი არ მოუწერიათ და ხელფასებს იღებენ. დღესაც იყო შოუს ნაწილი. გაკოტრებული პოლიტიკური ორგანიზაცია ცდილობს ყურადღება მიიქციოს სწორედ ასეთი შოუების დადგმით. მთელი დღეა ველაპარაკებით, თუ გინდა შემოდი და კითხვა დასვი, მაგრამ არა - ჩასაფრებული პოზიციიდან არის. ამ ჩასაფრებული პოზიციისთვის ყოველთვის დასჯის ამომრჩეველი, როგორც აქამდე სჯის. ეს არის მათი მომავალი და პოლიტიკური კარიერის დასასრული. "მებელიც" საჭიროა, რომ ჩვენი რიგითი თანამშრომლები კომფორტულად იყვნენ, ავტომობილებს, რომლებსაც ზედამხედველობის სამსახურისთვის შევიძენთ, ავტობუსებსაც მაგათ ჯინაზე იმიტომ, რომ თბილისი იყოს სიცოცხლით სავსე ქალაქი,- განაცხადა ზარქუამ.