„თიბისი ბანკის“ დამფუძნებლების, მამუკა ხაზარაძისა და ბადრი ჯაფარიძის ადვოკატის, ეკატერინე ეგუტიას განცხადებით, მამუკა ხაზარაძის გამოკითხვის ოქმი, რომელიც მისთვის „მუქარის წერილის“ გადაცემას ეხებოდა, საქმის მასალებში არ არის.

„მამუკა ხაზარაძე სასამართლოში მოსამართლის წინაშე გამოიკითხა, ანუ ოქმი უნდა არსებობდეს. პროკურატურამ თქვა, რომ ხაზარაძის დაკითხვა ფულის გათეთრების საქმის ფარგლებში ხდებაო. საქმე დანართებით გადმოგვეცა და იქ დაკითხვის ოქმი არ არსებობს. ეს გამოკითხვა რას ემსახურებოდა, ჩვენთვის გაუგებარია.

ფულის გათეთრების ნაწილში საერთოდ, დანაშაულის დეფინიციაში არ ჯდება ის, რასაც პროკურატურა აღწერს“, - განაცხადა ეგუტიამ და იქვე დასძინა, რომ ფულის გათეთრების საქმე იმიტომ არის გამოყენებული, რომ მას ხანდაზმულობის ვადა დიდი აქვს, ხოლო ყველა სხვა შესაძლო დანაშაულის ხანდაზმულობის ვადა უკვე გასულია.

„პროკურატურის მიერ წარდგენილი ყველა მასალა, დანართი არის ჩვენ სასარგებლოდ, ჩვენ უდანაშაულობას ამტკიცებს. საკრედიტო ხაზი, ხელშეკრულებები, ღიად და გამჭვირვალე გადარიცხვები, სასესხო ურთიერთობები - ეს არ არის ფულის გათეთრება. არც ერთ ელემენტში ფულის გათეთრების ელემენტებს არ შეიცავს. იმედია, რომ სასამართლო პირდაპირ შეწყვეტს საქმეს, იმიტომ, რომ მსგავსი მტკიცებულებებით არ შეიძლება აღიძრას საქმე. ფულის გათეთრების საქმეში „ტვ პირველის“ დამფუძნებლის ჩართვა თანამზრახველად, კიდევ უარესი ნონსენსია ამ დანაშაულის არსიდან გამომდინარე. ფულის გათეთრების საქმეს გრძელვადიანი ხანდაზმულობა აქვს, ყველაფერ სხვას ხანდაზმულობა აქვს გასული და თანაც, საკმაოდ შეურაცხმყოფელი მუხლი არის გამოყენებული ამ პირებისთვის, ბიზნესმენებისთვის, მათ საერთაშორისო რეპუტაცია აქვთ შელახული და შებღალული. ამ მუხლს საერთოდ, წინ სხვა დანაშაული უნდა უსწრებდეს, რაღაც დანაშაულით უნდა მივიღო ეს თანხა, რომ გავათეთრო. აღნიშნული დანაშაული საქმეში საერთოდ ვერ დგინდება“, - დასძინა ეგუტიამ.

ცნობისთვის, „თიბისი ბანკის“ დამძუნებლების, მამუკა ხაზარაძისა და ბადრი ჯაფარიძის ადვოკატები დღეს არასამთავრობო ორგანიზაციის წევრებს შეხვდენენ. შეხვედრაზე ინგლისიდან მიღებულ ექსპერტიზის შედეგზე ისაუბრეს, რომელიც „მუქარის წერილს“ ეხებოდა. ამასთან, ადვოკატმა მესამე სექტორის წარმომადგენლებს ხაზარაძე-ჯაფარიძის ბრალთან დაკავშირებითაც მიაწოდა ინფორმაცია, რომელიც ფულის გათეთრებას ეხება.

1 აშშ დოლარის ოფიციალური ღირებულება 2.9624 ლარი გახდა. ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად აშშ დოლარის ღირებულებამ 2.9624 ლარი შეადგინა. კურსი, რომელიც დღეს მოქმედებდა, 2.9688 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0064 შეადგინა.

რაც შეეხება ევროს, მისი კურსი 3.2634 ლარია. მაშინ, როცა დღეს მოქმედი კურსი 3.2784 ლარს შეადგენდა. შესაბამისად, ევროს ცვლილებამ 0.015 ლარი შეადგინა.

დღევანდელი ვაჭრობის შედეგად მიღებული კურსები ძალაში ხვალ შევა.

აჭარის მთავრობის თავმჯდომარე თორნიკე რიჟვაძემ შავი ზღვის სანაპირო ქვეყნების ძებნა-გადარჩენის რიგით მე-15 კონფერენცია გახსნა. ამის შესახებ „ინტერპრესნიუსს“ აჭარის მთავრობიდან აცნობეს.

მათი ინფორმაციით, ღონისძიება, რომელსაც საქართველო უკვე მეორედ მასპინძლობს, შავი ზღვის აუზის ქვეყნებს შორის გამოცდილების გაზიარებასა და შავ ზღვაზე ძებნა-გადარჩენის სფეროში თანამშრომლობის გაძლიერებას ემსახურება.

თორნიკე რიჟვაძემ დამსწრე საზოგადოებას სიტყვით მიმართა და აღნიშნა, რომ საზღვაო სფერო, როგორც ეროვნული ეკონომიკისთვის, ასევე განსაკუთრებით ბათუმისთვის მნიშვნელოვანია.

„დღეს ბათუმი მასპინძლობს ძებნა-გადარჩენის ოპერაციების კონფერენციას, რომელშიც მონაწილეობენ წარმომადგენლები მეზობელი ქვეყნებიდან. ჩვენთვის საზღვაო სფერო არის მნიშვნელოვანი, როგორც ეროვნული ეკონომიკისთვის, ისე განსაკუთრებით ბათუმისთვის, ვინაიდან 11 000-ზე მეტი მეზღვაური გვყავს ქალაქში. რაც შეეხება კონკრეტულ თემატიკას, ბუნებრივია მნიშვნელოვანია ძებნა-გადარჩენის ოპერაციებში საერთაშორისო სტანდარტების გათვალისწინება და ამ სტანდარტების დაცვა",- აღნიშნა თორნიკე რიჟვაძემ.

„მსგავსი ტიპის ღონისძიებების ჩატარება რეგიონისთვის მნიშვნელოვანია ინციდენტების დროს შავ ზღვაზე კოორდინირებული და თანმიმდევრული მოქმედებისთვის. შესაბამისად, შავი ზღვის ქვეყნების წარმომადგენლები ყოველწლიურად მართავენ მსგავსი ტიპის ღონისძიებებს იმისთვის, რომ მოხდეს ინფორმაციის გაცვლა თუ რა შედეგებით დასრულდა წელი და რა სახის გამოწვევები არსებობდა.

საპატიო სტუმრების რანგში კონფერენციას საერთაშორისო საზღვაო ორგანიზაციისა (IMO) და ევროპის საზღვაო უსაფრთხოების სააგენტოს (EMSA) წარმომადგენლები ესწრებოდნენ, ასევე საქართველოს სამინისტროებისა და სახელმწიფო უწყებების: ეკონომიკისა და მდგრადი განვითარების სამინისტროს, შინაგან საქმეთა სამინისტროს, თავდაცვის სამინისტროს, აღმასრულებელი ხელისუფლების საზღვაო ოპერაციების ერთობლივი მართვის ცენტრის, სამოქალაქო ავიაციის სააგენტოს, შპს „საქაერონავიგაციისა“ და სახელმწიფო ჰიდროგრაფიის სააგენტოს თანამდებობის პირები", - ნათქვამია ინფორმაციაში.

11 სექტემბერს, სასტუმრო „თბილისი მერიოტში“ ამერიკის იურისტთა ასოციაციასა (ABA) და „საქართველოს ადვოკატთა ასოციაციის“ თანამშრომლობის ფარგლებში გაიმართა მრგვალი მაგიდა და დისკუსია ამერიკის ადვოკატთა ასოციაციის ექსპერტებთან. როგორც „ინტერპრესნიუსს“ „ადვოკატთა ასოციაციიდან“ აცნობეს, ღონისძიებაზე გახმაურებული საქმეების განხილვის თავისებურებებისა და ამერიკული გამოცდილების შესახებ ისაუბრეს.

მრგვალ მაგიდაზე გახსნითი სიტყვით გამოვიდნენ „საქართველოს ადვოკატთა ასოციაციის“ თავმჯდომარე დავით ასათიანი, საქართველოს უზენაესი სასამართლოს მოსამართლე გიორგი შავლიაშვილი და საქართველოს გენერალური პროკურორის მოადგილე გიორგი გაბიტაშვილი.

ღონისძიებაზე სასაუბრო თემათა შორის იყო გახმაურებულ საქმეთა განხილვის თავისებურებანი: ამერიკის შეერთებული შტატების გამოცდილება და პრაქტიკა. ასევე სასამართლოს, ადვოკატურასა და პროკურატურას შორის კომუნიკაციის ეთიკური ასპექტები: ამერიკის შეერთებული შტატების გამოცდილება და პრაქტიკა.

ჩხოროწყუს სოფელ ლესიჭინეში ორსართულიანი სახლი იწვის. როგორც „ინტერპრესნიუსს“ საგანგებო სიტუაციების მართვის სამსახურში განუცხადეს, ხანძრის ჩასაქრობად ადგილზე ოთხი სახანძრო-სამაშველო ჯგუფია მობილიზებული.

ჩხოროწყუს მერის, დავით გოგუას ინფორმაციით, სახლში ექვსი ადამიანი ცხოვრობდა. მისივე თქმით, ცეცხლი თავდაპირველად დამხმარე ნაგებობას გაუჩნდა, რის შემდეგად სახლს მოეკიდა.

შემთხვევის შედეგად არავინ დაშავებულა.