სიღნაღის მუნიციპალიტეტს აღმოსავლეთ უკრაინიდან დელეგაცია ეწვია. სტუმრებს სიღნაღის მუნიციპალიტეტის მერმა გიორგი გოგილაშვილმა უმასპინძლა.

როგორც „ინტერპრესნიუსს“ სიღნაღის მუნიციპალიტეტიდან აცნობეს, დელეგაცია ძირითადად დონეცკისა და ლუგანსკის ოლქის დასახლებული პუნქტების მერებისგან შედგებოდა.

სიღნაღის მუნიციპალიტეტის ინფორმაციით, შეხვედრის ძირითადი მიზანი ქართული გამოცდილების გაზიარება და სამომავლო ურთიერთთანამშრომლობის დამყარება იყო. უწყების ცნობით, სტუმრები დეცენტრალიზაციის, მუნიციპალიტეტის ბიუჯეტის, ასევე, შესყიდვების საკითხებით დაინტერესდნენ, რაზეც მუნიციპალიტეტის თანამშრომლებისგან ამომწურავი პასუხები მიიღეს.

გიორგი გოგილაშვილმა მათ ქალაქის ისტორიაც გააცნო, რის შემდეგაც დელეგაციის წევრებმა ღირსშესანიშნაობები დაათვალიერეს.