ზუგდიდში, კომბინატის დასახლებაში, ყოფილი უნივერსიტეტის შენობაში სარემონტო სამუშაოები ჩატარდა, წყლის საქაჩი ახალი ტუმბო დამონტაჟდა და კორპუსში შიდა ინფრასტრუქტურა მოწესრიგდა - ამის შესახებ ,,ინტერპრესნიუსს’’ აფხაზეთის ავტონომიური რესპუბლიკის მთავრობიდან აცნობეს. აღნიშნული სამუშაოები, აფხაზეთის ავტონომიური რესპუბლიკის ოკუპირებული ტერიტორიიდან იძულებით გადაადგილებილ პირთა-დევნილთა საკუთრებაში/სარგებლობაში გადაცემულ საცხოვრებელ ობიექტებში, მცირეფასიანი და გადაუდებელი სარემონტო სახის სამუშაოების ჩატარების პროგრამის ფარგლებში განხორციელდა.
ასევე, სამეგრელოში სარეაბილიტაციო სამუშაოები სოფელ ჭითაწყარში, ელქსელისა და აღმაშენებლის №222-ში მდებარე, ყოფილი პროფსასწავლებლის შენობებში მიმდინარეობს. დაგეგმილია ინფრასტრუქტურული სარემონტო სამუშაოების დაწყება ხუბულავას ქუჩაზე №14-ში (ყოფილი ვეტლაბორატორიის ერთსართულიანი შენობა) დევნილთა კომპაქტურ ჩასახლებაში.
აღსანიშნავია, რომ სარემონტო-სარეაბილიტაციო სამუშაოები აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა რუსლან აბაშიძემ ადგილზე დაათვალიერა.
„აღნიშნულ ობიექტებზე აფხაზეთის ავტონომიური რესპუბლიკიდან იძულებით გადადგილებულ პირთა - დევნილთა მინისტრის მოადგილე დავით მიქავა, სამეგრელო - ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი რეზო ქობალია და სარემონტო-აღდგენითი სამუშაოების განმსაზღვრელი კომისიის წევრები იმყოფებოდნენ. მათ სამუშაოების მიმდინარეობას მონიტორინგი გაუწიეს’’, - ნათქვამია ინფორმაციაში.