ახალ სასწავლო წელს ბორჯომის მუნიციპალიტეტის 12 საჯარო სკოლა სიახლეებით შეხვდა. როგორც „ინტერპრენიუსს“ ბორჯომის მუნიციპალიტეტიდან აცნობეს, სკოლებში სპორტული მოედნები და სველი წერტილები მოეწყო, ასევე ჩატარდა კოსმეტიკური სამუშაოები.
ბორჯომის მერის ლევან ლიპარტიას თქმით, პროექტები განხორციელდა: ქალაქის №1, №3, №4, №6, ასევე, ახალდაბის, ტაძრისის, ჭობისხევის, დვირის, კორტანეთის, რველის, ყვიბისისა და ქვაბისხევის საჯარო სკოლებში. ამასთან, იქ, სადაც საპირფარეშოები გარე ტერიტორიაზე მდებარეობდა გაუქმდა და სკოლის შენობაში ადაპტირებული საპირფარეშოები მოეწყო. ასევე, გაკეთდა პანდუსებიც.
ახალდაბის საჯარო სკოლაში სრული რეაბილიტაცია ჩაუტარდა სპორტულ დარბაზს. დვირის, ტაძრისის, ყვიბისის და რველის სკოლებში კი გარე სპორტული მოედნები მოეწყო.
სკოლებში სხვადასხვა ინფრასტრუქტურული პროექტის განხორციელებას მუნიციპალიტეტი მომავალშიც აქტიურად გააგრძელებს.