„ოქტომბრის ბოლოს, დავამთავრებ ხელმოწერების შეგროვებას, შემდეგ დავაანონსებ, რომ ხალხი გამოვიდეს და ვინც გარეთ გამოვა, სახლში არ წავა, ვიდრე თემირლანის საქმესთან დაკავშირებით ყველაფერს პასუხი არ გაეცემა, - ამის შესახებ პანკისის ხეობაში ჩატარებული სპეცოპერაციისას მოკლული თემირლან მაჩალიკაშვილის მამამ, მალხაზ მაჩალიკაშვილმა პარლამენტთან განაცხადა, სადაც 20-21 ივნისის მოვლენების დროს დაკავებული პირების გათავისუფლების მოთხოვნით კარავი გაშალეს.
მალხაზ მაჩალიკაშვილის თქმით, 20-21 ივნისის მოვლენების დროს დაკავებულების მხარდასაჭერად დადგმული კარავი რიგით მესამეა, რომელიც პარლამენტთან დგას.
„აქ სულ 3 კარავი დგას. ერთი თემირლანის საქმესთან დაკავშირებით, მეორე - გიორგი მამალაძის საქმეზე, მესამე „გავრილოვის ღამის“, ივანიშვილის პირადი პატიმრების გათავისუფლების მოთხოვნის მიზნით. ეს კარვები იქამდე იქნება, სანამ ყველა ადამიანი არ იქნება გათავისუფლებული ტყვეობიდან. ამათ კიდევ ბევრი კარავი დაემატება. ოქტომბრის ბოლოს, მე დავამთავრებ ხელმოწერების შეგროვებას და დავაანონსებ, რომ ხალხი გამოვიდეს. ის ხალხი ვინც გარეთ გამოვა, სახლში არ წავა, ვიდრე თემირლანის საქმესთან დაკავშირებით ყველაფერს პასუხი არ გაეცემა“, - განაცხადა მაჩალიკაშვილმა.