სამოქალაქო მოძრაობა „სირცხვილიას“ წევრები გორში, უნივერსიტეტის შენობაში საკონსტიტუციო ცვლილებების საჯარო განხილვაზე არ დაუშვეს. როგორც „ინტერპრესნიუსს“ მოძრაობის ერთ-ერთმა აქტივისტმა გიგა მაქარაშვილმა განუცხადა, ამის მიზეზად პოლიციამ მათ შენობაში საკმარისი ადგილების უქონლობა დაუსახელა.
გიგა მაქარაშვილის თქმით, აქტივისტებმა ტერიტორია უკვე დატოვეს, რადგან ქვეყნისთვის მნიშვნელოვანი ცვლილებების განხილვის პროცესში, „ზედმეტ ჩოჩქოლს“ მოერიდნენ.
„ბუნებრივია, ხელი არ შევუშალეთ. ძალიან მნიშნველოვანი პროცესია პროპორციულ სისტემაზე გადასვლა მთელი ქვეყნისთვის. ბევრი ახსნა-განმარტების შემდეგ, რომ არ აქვთ უფლება შემიზღუდონ გადაადგილება და საჯარო განხილვას არ დამასწრონ, მივხვდი, რომ აზრი არ ჰქონდა. პოლიციელების რაოდენობა ემატებოდა, ზედმეტი ჩოჩქოლი რომ არ გამოგვეწვია, დავტოვეთ ტერიტორია“,-განაცხადა გიგა მაქარაშვილმა.