გურიაში საკონსტიტუციო ცვლილებების საყოველთაო განხილვა მიმდინარეობს. შეხვედრა ოზურგეთში, ფოლკლორის ცენტრში იმართება და ესწრებიან მმართველი გუნდის წევრები, ოპოზიციური პარტიების წარმომადგენლები და კონსტიტუციონალისტები.

როგორც შეხვედრაზე პარლამენტის თავმჯდომარემ, არჩილ თალაკვაძემ განაცხადა, ყველა პარტიამ თავისი ძალები დამოუკიდებლად უნდა მოსინჯოს და მოიპოვოს იმდენი მანდატი, რა მხარდაჭერაც აქვთ.

„როგორც მისცემენ მოქალაქეები პარტიებს ხმას, იმ რაოდენობის მანდატები ექნებათ. პირველად მოხდა ისტორიაში, როდესაც ხელისუფლებაში მყოფმა პარტიამ მიიღო დემოკრატიული გადაწყვეტილება, რომ შეცვალოს საარჩევნო სისტემა. მაჟორიტარების მანდატები ყველა მმართველი ძალისთვის იყო უპირატესობა“, - განაცხადა თალაკვაძემ და აღნიშნა, რომ თარიღის გადმოტანა 2020 წლისთვის „ახალგაზრდების გულწრფელმა პროტესტმა" გამოიწვია.

მისივე თქმით, საარჩევნო კოდექსში იგეგმება ცვლილებები, რაც პარტიების დაფინანსებას, საარჩევნო კამპანიების გაუმჯობესებასა და მედიაში დროის გადანაწილების პროცესს შეეხება.