თემქაზე მოკლული 20 წლის ანა ნაცვლიშვილის მკვლელობაში მსჯავრდებულ ლადო გრიგალაშვილის ადვოკატის, ნაირა ოტიაშვილის სასამართლო პროცესი 16:00 საათზე დაინიშნა.

როგორც „ინტერპრესნიუსისთვის" გახდა ცნობილი, დღევანდელ სხდომაზე, სადაც ნაირა ოტიაშვილისა და მასთან ერთად დაკავებული დედა-შვილის მიმართ აღკვეთის ღონისძიების შეფარდებაზე უნდა იმსჯელონ, პროკურატურა ოტიაშვილის გირაოს სანაცვლოდ გათავისუფლების შუამდგომლობას დააყენებს. დაუდასტურებელი ინფორმაციით, პროკურატურა გირაოს 3 000-ლარის ოდენობით მოითხოვს.

ნაირა ოტიაშვილსა და მასთან ერთად დაკავებულ ორ პირს ბრალი ოფიციალურად გუშინ წარუდგინეს.

როგორც ბრალდებულის ადვოკატი, ონისე მარგიანი აცხადებს, ის სასამართლოში ოტიაშვილის აღკვეთის ღონისძიების გარეშე დატოვების შუამდგომლობას დააყენებს.

შს სამინისტროს ინფორმაციით, შინაგან საქმეთა სამინისტროს თბილისის პოლიციის დეპარტამენტის ძველი თბილისის სამმართველოს თანამშრომლებმა, დედა-შვილი და მათი ადვოკატი ნაირა ოტიაშვილი თბილისში, მოსამართლის განჩინების საფუძველზე დააკავეს.

როგორც შსს-ს მიერ გავრცელებულ ინფორმაციაშია ნათქვამი, მათ ბრალი ანგარებით ან სხვა პირადი მოტივით ჩადენილ ცრუ დასმენაში ედებათ.