შს მინისტრმა ვახტანგ გომელაურმა ჩრდილოატლანტიკური საბჭოს (NAC) ვიზიტის ფარგლებში, რეგიონული უსაფრთხოების თემაზე გამართული შეხვედრის მონაწილეებს სიტყვით მიმართა. შეხვედრა ბათუმში გაიმართა, რომელშიც მონაწილეობა მიიღო ნატოს გენერალური მდივნის მოადგილემ როუზ გოტემიოლერმა და ალიანსის 29 წევრი ქვეყნის მუდმივმა წარმომადგენელმა.
შს მინისტრმა ვახტანგ გომელაურმა სიტყვით გამოსვლისას რეგიონის უსაფრთხოების აქტუალური საკითხები მიმოიხილა.
ვახტანგ გომელაურის შემდეგ ღონისძიების მონაწილეებს სიტყვით საქართველოს სასაზღვრო პოლიციის უფროსმა თემურ კეკელიძემ მიმართა. მან თავის სიტყვაში შავი ზღვის უსაფრთხოების კონტექსტში, ნატო-საქართველოს პრაქტიკული თანამშრომლობის საკითხებზე ისაუბრა.
როგორც შსს-ს მიერ გავრცელებულ ინფორმაციაშია აღნიშნული, შეხვედრა მნიშვნელოვანი შესაძლებლობაა ნატოსა და საქართველოს, როგორც ალიანსის საიმედო პარტნიორს შორის რეგიონის უსაფრთხოების საკითხებზე ინფორმაციის გაცვლისა და სამომავლო თანამშრომლობის გაღრმავების შესაძლებლობებისთვის.