„სამოქალაქო მოძრაობამ" ექსპერტების ჯგუფთან ერთად შემუშავებული „მომავლის არმიის" ხედვის პრეზენტაცია გამართა. როგორც „ინტერპრესნიუსს" „სამოქალაქო მოძრაობიდან" აცნობეს, „მომავლის არმიის" ხედვა „სამოქალაქო მოძრაობის" ლიდერმა ალეკო ელისაშვილმა და მოძრაობის „თავდაცვისა და უსაფრთხოების მიმართულების" ხელმძღვანელმა პაატა გიგაურმა წარმოადგინეს.

„მომავლის არმიის" ხედვა ორი კომპონენტისგან შედგება - პრობლემების აღწერისა და ამ პრობლემების გრძელვადიანი მოგვარების გზებისგან. 8 მოდულისგან შემდგარი ხედვა თავდაცვის ბიუჯეტის გაორმაგებას და ხარჯვის კონტროლის გამკაცრებას გულისხმობს. ასევე რეფორმების გრძელვადიანი მონიტორინგის მიზნით, სამოქალაქო კურატორისა და სამხედრო ომბუდსმენების პოსტების შემოღებას და პარლამენტის მიერ, მათ დამტკიცებას.

„მომავლის არმიის" მიხედვით, თავდაცვის ძალები მხოლოდ ნებაყოფლობითი პრინციპით დაკომპლექტება და სავალდებულო სამსახურზე მორატორიუმი გამოცხადდება. ქვეყნის თავდაცვაში აქტიურად ჩაერთვებიან მოხალისეები, მათ შორის შშმ პირები. ხედვა გულისხმობს მსროლელთა კლუბების დაარსებასა და იარაღის ფარული ტარების უფლების დაკანონებას, ახალგაზრდული ორგანიზაციის მხარდაჭერას და ეროვნული სამხედრო მუზეუმის დაარსებას", - განაცხადა პრეზენტაციის დროს ალეკო ელისაშვილმა.

პრეზენტაციის შემდეგ, „სამოქალაქო მოძრაობამ" – „მომავლის არმიის" ხედვა ყველა შესაბამის სამთავრობო სტრუქტურას, ძირითად პოლიტიკურ სუბიექტსა და ორგანიზაციას გადაუგზავნა.

„სამოქალაქო მოძრაობას" მიაჩნია, რომ თავდაცვის გაძლიერება და არმიის მშენებლობა ეროვნული თანხმობის საფუძველზე უნდა განხორციელდეს. სწორედ ამ მიზნით, „სამოქალაქო მოძრაობა" დისკუსიისა და პოზიციის შეჯერებისათვის მზადაა.