არც ერთ გადაწყვეტილებაზე პოლიტიკურ განწყობებს გავლენა არ მოუხდენია, - ამის შესახებ უზენაესი სასამართლოს მოსამართლეობის კანდიდატმა და მოქმედმა გენერალურმა პროკურორმა შალვა თადუმაძემ იურიდიულ საკითხთა კომიტეტის სხდომაზე უმრავლესობის წევრი დეპუტატის, ნინო გოგუაძის კითხვის პასუხად განაცხადა, რომელიც დაინტერესდა, რამდენად დამოუკიდებლად გრძნობს თავს მის პროფესიაში, იმ დროს, როცა მისი საქმიანობის დიდი ნაწილი მმართველ გუნდს უკავშირდება.

„შემიძლია ვთქვა თამამად, რომ დღეს მნიშვნელოვან თანამდებობას ვიკავებ და პასუხისმგებელი ვარ ყველა იმ გადაწყვეტილებაზე, რომელიც წელიწად-ნახევრის განმავლობაში ნებისმიერმა პროკურორმა საქართველოს პროკურატურაში მიიღო და არც ერთი გადაწყვეტილება არ იყო პოლიტიკური ნიშნით. ჩემზე პოლიტიკურ განწყობებს გავლენა არ მოუხდენია. ბუნებრივია, კარგად იცით, რომ პროკურატურა პოლიტიკურ განწყობებზე არ მუშაობს.

მესმის, რომ საკმაოდ სერიოზული კითხვებია პროკურატურის ეფექტურ საქმიანობასთან დაკავშირებით, არის პრობლემები, ბუნებრივია, მაგრამ ის, რომ პროკურატურა მოქცეულია პოლიტიკური ზეწოლის ქვეშ, ასეთი შემთხვევა არ არის და დარწმუნებული ვარ, რომ მომავალ საქმიანობაშიც, მაქსიმალურად დამოუკიდებელი ვიქნები“, - განაცხადა შალვა თადუმაძემ.