ჩვენ წარვადგინეთ ახალი ელექტრონული პლატფორმა, რომლის საშუალებითაც მოქალაქეებს მხოლოდ და მხოლოდ ინტერნეტის გამოყენებით, საშუალება ექნებათ შექმნან პეტიციები, დაარეგისტრირონ საკანონმდებლო ინიციატივები და ხელმოწერებიც შეაგროვონ ონლაინ რეჟიმში, - ამის შესახებ პარლამენტის თავმჯდომარემ, არჩილ თალაკვაძემ ჟურნალისტებთან საუბრისას განაცხადა.

თალაკვაძის თქმით, აღნიშნული პროექტი შესაძლებლობას მისცემს მოქალაქეებს საპარლამენტო საქმიანობაში პირდაპირ მიიღონ მონაწილეობა.

„საშემოდგომო სესიაზე საზოგადოებას ჩვენ წარვუდგინეთ ათი სამუშაო საკითხი, ათი მთავარი გამოწვევა, რომელიც პარლამენტს აქვს ამ სესიაზე და რომელსაც ჩვენ ვუპასუხეთ კონკრეტული საქმით და კონკრეტული შედეგებით. დღეს, საპროცედურო საკითხთა კომიტეტის თავმჯდომარესთან ერთად, ჩვენ წარვადგინეთ ახალი ელექტრონული პლატფორმა, რომლის საშუალებითაც მოქალაქეებს მხოლოდ და მხოლოდ ინტერნეტის გამოყენებით საშუალება ექნებათ შექმნან პეტიციები და ასევე, დაარეგისტრირონ საკანონმდებლო ინიციატივები და ხელმოწერებიც შეაგროვონ ონლაინ რეჟიმში. ანუ ის წესი, რომ მხოლოდ ფურცლებით და მოქალაქეებთან უშუალო შეხვედრით იყო ეს შესაძლებელი, დღეიდან ამ ალტერნატივითაც შეიცვლება. ეს შესაძლებლობას მისცემს ჩვენს მოქალაქეებს, რომ პირდაპირ მიიღონ მონაწილეობა საპარლამენტო საქმიანობაში, როგორც კანონშემოქმედებითი მიმართულებით, ასევე ზედამხედველობის მიმართულებით. მე იმედი მაქვს, რომ ამ შესაძლებლობას მოქალაქეები აქტიურად გამოიყენებენ“, - განაცხადა თალაკვაძემ.