„რუსეთი ყოველთვის მოიქცევა აგრესიულად, რასაც საქართველოს ხელისუფლების ძალიან მტკიცე პოლიტიკური პოზიცია სჭირდება, რასაც ჩვენ ვერ ვხედავთ“, - ამის შესახებ „ევროპული საქართველოს“ წევრმა, ნდობის ჯგუფის წევრმა, ირაკლი აბესაძემ პარლამენტის ნდობის ჯგუფის სხდომის დასრულების შემდეგ განაცხადა.

მან სოფელ ატოცში შექმნილ ვითარებაზე ისაუბრა და ყურადღება „არგაღიზიანების პოლიტიკაზე“ გაამახვილა.

„არაერთხელ აღგვინიშნავს, რომ რა თქმა უნდა, რუსეთი ყოველთვის მოიქცევა აგრესიულად და საერთაშორისო სამართლის ნორმების უხეში დარღვევით, ყოველთვის ეცდება ქართული ტერიტორიების ხელყოფას. ამას სჭირდება საქართველოს ხელისუფლების მხრიდან ძალიან მტკიცე პოლიტიკური პოზიცია პირველ რიგში, რასაც ჩვენ ვერ ვხედავთ. ამის სანაცვლოდ ჩვენ ვხედავთ რუსეთის არგაღიზიანების პოლიტიკას, რომელიც პირიქით, პირდაპირ ასხამს რუსეთის წისქვილზე წყალს და პირიქით, ახალისებს მარიონეტულ რეჟიმებს და რუსეთის აგრესიულ ხელისუფლებას, რომ კიდევ უფრო მეტი ტერიტორია მიიტაცოს საქართველოდან - არანაირი შემაკავებელი პოლიტიკა არ არსებობს ამის საწინააღმდეგოდ. მეორეს მხრივ, არ არსებობს შიგნით უსაფრთხოების სისტემები, რომელიც გარკვეულწილად ხელს შეუშლიდა ამ პროცესის მიმდინარეობას. ამ საკითხებზე, რა თქმა უნდა, მსჯელობა გვქონდა ნდობის ჯგუფის ფარგლებშიც“, - განაცხადა აბესაძემ.