„ვისაუბრეთ 20 ივნისის საკითხებზე და გაცემული პასუხებიდან გამომდინარე კიდევ უფრო ძლიერდება ეჭვი და განწყობაც, რომ ხელისუფლება დიდწილად პასუხისმგებელია იმ სისხლიან დარბევაში“, - ამის შესახებ „ევროპული საქართველოს“ და ნდობის ჯგუფის წევრმა ირაკლი აბესაძემ პარლამენტში, პარლამენტის ნდობის ჯგუფის სხდომის დასრულების შემდეგ განაცხადა.
მან ისაუბრა იმ თემების შესახებ, რასაც ნდობის ჯგუფი შეეხო. შეხვედრას საქართველოს შინაგან საქმეთა მინისტრი ვახტანგ გომელაური ესწებოდა.
„მსჯელობა გვქონდა ოთხოზორია-ტატუნაშვილის და სხვების მკვლელებთან დაკავშირებით და კვლავ ძალიან დიდი ბუნდოვანებაა და გაუგებარია რატომ არ აკეთებს ქართული ხელისუფლება იმას, რომ ბრალი წაუყენოს ყველას, ვინც ამ მკვლელობაში იყო ჩართული, მიუხედავად იმისა, რომ პარლამენტის დადგენილება არსებობს ამ საკითხზე. ვისაუბრეთ 20 ივნისის საკითხებზე და აქაც, რა თქმა უნდა, გაცემული პასუხებიდან გამომდინარე კიდევ უფრო ძლიერდება ეჭვი და განწყობაც, რომ ხელისუფლება დიდწილად პასუხისმგებელია იმ სისხლიან დარბევაში და სწორედ მათი არასწორი გადაწყვეტილებების გამო იქნა ეს შედეგი დამდგარი, რაც იყო. რა თქმა უნდა, გაუგებარია, დღემდე როგორ შეიძლება თვალებდათხრილი ადამიანები არ ჰყავდეს სახელმწიფოს დაზარალებულად ცნობილი“, - განაცხადა აბესაძემ.