ქუთაისში მოსკოვის თეატრის გასტროლს აქციით აპროტესტებენ
ქუთაისის ლადო მესხიშვილის სახელობის სახელმწიფო დრამატული თეატრის წინ საპროტესტო აქცია მიმდინარეობს. აქციის მონაწილეები მოსკოვის თეატრის გასტროლს აპროტესტებენ, რომელიც ქუთაისში დღეს დაიწყო. სამოქალაქო აქტივისტები ამბობენ, რომ „დაუშვებელია ოკუპანტი ქვეყნის თეატრის მსახიობებმა სპექტაკლი საქართველოში ითამაშონ“.
მესხიშვილის თეატრის ადმინისტრაცია კი აცხადებს, რომ ეს არის ხალხთა შორის კულტურის გაცვლა.
„არ გვესმის რატომ არ უნდა გაიმართოს გასტროლი, ეს არის ხალხთა შორის კულტურის გაცვლა. აქ პოლიტიკა არაფერ შუაში არ არის“, - განუცხადა „ინტერპრესნიუსს“ ქუთაისის თეატრის დირექტორმა სულხან გოგოლაშვილმა.
მისივე თქმით, მოსკოვის თეატრის გასტროლს არც ერთი საბიუჯეტო ორგანიზაცია არ აფინანსებს და ისინი თავიანთი ხარჯით ჩამოვიდნენ.
აქცია, მოსკოვის თეატრ „ნიკიტკის კარიბჭეს“ წინააღმდეგ ამ წუთებში მიმდინარეობს.
