თელავში, ერეკლე მეფის მოედანზე მოძრაობის “ქვეყნის სამსახურში” ლიდერები საპროტესტო აქციისთვის ემზადებიან. აქცია 17:00 საათზე დაიწყება. ტერიტორიაზე უკვე შეკრებილები არიან აქციის ორგანიზატორები და აქტივისტების ნაწილი. უშუალოდ აქციის დაწყებამდე დაგეგმილია ქალაქის ცენტრალურ ქუჩებზე ავტომობილებით მსვლელობაც.
აქციის ერთ-ერთი ორგანიზატორის ნოდარ რუხაძის ინფორმაციით, დღეს საპროტესტო აქციაზე სცენა ძირითადად დაეთმობათ ადგილობრივ მოსახლეობას, რომ მათ საკუთარი პრობლემები გააჟღერონ. მისივე განცხადებით, აქცია ღიაა ყველა მსურველისთვის და დღეს თელავში პოლიტიკური პარტიების წარმომადგენლებსაც ელოდებიან.
“ჩვენი აქციების სამი თვის თავზე საქართველოს მოქალაქეებს დავპირდით, რომ შემოვივლიდით ყველა რეგიონს და მივიდოდით ყველგან , სადაც ჯერ კიდევ შემორჩენილია იმედის ნაპერწკალი, რომ ცვლილება შესაძლებელია და ჩვენ შეგვიძლია ხელისუფლება გავუშვათ მშვიდობიანი პროპორციული არჩევნების გზით სახლში. ჩვენი აქ ჩამოსვლის მიზანი სწორედ ეს არის. უნდა გავესაუბროთ თელაველ მოსახლეობას, გავიგოთ რა პრობლემები აქვთ, რა ვერ გადაჭრა ადგილობრივმა ხელისუფლებამ და რაც მთავარია, უნდა ვისაუბროთ პროპორციული არჩენების, ჩვენი მთავარი მონაპოვარის მნიშვნელობაზე. ჩვენი მიზანი არის, რომ 2020 წლის პროპორციულ არჩევნებზე მივიდეს მოქალაქეების რეკორდული მაჩვენებელი და ბიძინა ივანიშვილმა ვეღარ მოახერხოს რიცხვებით მანიპულირება”,-განაცხადა ნოდარ რუხაძემ.
მოძრაობამ "ქვეყნის სამსახურში" რეგიონებში გასვლა კახეთიდან დაიწყო და მსგავს აქციებს ქვეყნის მასშტაბით გამართავს.