უზენაესი სასამართლოს მოსამართლეობის კანდიდატი პაატა სილაგაძე შურისძიების საფრთხეებზე საუბრობს.

სილაგაძეს პარლამენტის იურიდიულ საკითხთა კომიტეტის სხდომაზე უსმენენ. მისთვის კითხვები დამოუკიდებელ დეპუტატს ეკა ბესელიას უნდა დაესვა, თუმცა მოსამართლეობის კანდიდატმა განცხადების გაკეთება ითხოვა და აღნიშნა, რომ ეკა ბესელიას აქვს წინასწარ ნეგატიური განწყობა მის მიმართ, ვინაიდან მან ეკა ბესელიას შვილისა და ძმის საქმე განიხილა.

„როდესაც 10 -კაციანი სია შედგა, პირველი კომენტარები ქალბატონი ეკასგანაც იყო, რომ მისი შვილის საქმის მოსამართლის კანდიდატურის განხილვა არ უნდა მომხდარიყო. მას წინასწარ, გამოკვეთილი აქვს აზრი, რომ მე უარყოფითი პიროვნება ვარ. ასევე იყო გუშინ, „პალიტრანიუსზე“, როდესაც ის ინტერვიუს აძლევდა და ამბობდა: - „ნახეთ რა ელის მას, უარეს მდგომარეობაში ჩავარდება. სასაცილოა ამ კანდიდატის წარმოდგენა საერთოდ“. ამ შემთხვევაში მე ვფიქრობ, რომ ეს იქნება შურისძიების ეტაპი, იმიტომ, რომ მე მისი შვილის საქმე განვიხილე“, - განაცხადა პაატა სილაგაძემ.

მოსამართლეობის კანდიდატს განცხადების გაკეთება სხდომის წამყვანმა დავით მათიკაშვილმა შეაწყვეტინა და განუმარტა, რომ მას უნდა მოესმინა კითხვები და შესაბამისი პასუხები გაეცა, „თუ სურვილი აქვს“.