მთავრობის ადმინისტრაციასთან სამოქალაქო აქტივისტებმა აქცია-პერფორმანსი გამართეს. როგორც აქციის წევრებმა განაცხადეს, ისინი მმართველი პარტიის ლიდერების მხრიდან გაკეთებულ პრორუსულ განცხადებებს აპროტესტებენ. აქციის მონაწილეებმა პლაკატი მიიტანეს წარწერით „რუსული ოცნება“, რომლის გარშემოც „ქართული ოცნების“ დეპუტატების, პრემიერის და მინისტრების სახელები და გვარები ეწერა.

„დღევანდელი აქციით, საქართველოს მოქალაქეებს კიდევ ერთხელ შევახსენეთ, რომ „ქართული ოცნება“ რეალურად არის „რუსული ოცნება“ და ეს პოლიტიკური ძალა ემსახურება იმას, რომ საქართველოში გაძლიერდეს რუსული პოლიტიკური ინტერესები, ჩვენი დასავლური საგარეო კურსი შეიცვალოს ჩრდილოეთით და ზოგადად იმას, რომ ქვეყანაში გაიზარდოს რუსული ინვესტიცია, რუსული კაპიტალი და რუსული გავლენის აგენტების რიცხვი. კიდევ ერთხელ გვინდა საქართველოს მოქალაქეებს შევახსენოთ, რომ მოდის 2020 წლის არჩევნები და ყველა მოქალაქის ვალია, გააკეთოს ინფორმირებული არჩევანი და არ მისცეს ხმა პრორუსულ პოლიტიკურ პარტიებსა და სატელიტებს," - განაცხადა სამოქალაქო აქტივისტმა ნოდარ რუხაძემ.