კენჭისყრის დღე მიმდინარეობს მშვიდ გარემოში და წესების დაცვით, თუმცა, ლაგოდეხში მცირე პროცედურული დარღვევები დაფიქსირდა,- ამის შესახებ განვითარებისა და დემოკრატიის ცენტრში აცხადებენ, რომლის სადამკვირვებლო მისია საკრებულოს შუალედურ არჩევნებს სამივე ოქლში აკვირდება. მათივე ინფორმაციით, აღნიშნულ დარღვევებს კენჭისყრის პროცესზე ზეგავლენა არ მოუხდენია.
"კერძოდ, დაფიქსირდა არაუფლებამოსილი პირის ყოფნა საარჩევნო უბანზე, ასევე სათანადო დოკუმენტაციის გარეშე, კერძოდ, ვადაგასული პირადობის მოწმობით ხმის მიცემის მცდელობა, რეგისტრატორისა და ნაკადის მომწესრიგებლის მხრიდან ფუნქციების არაჯეროვანი შესრულება, სამივე ეს დარღვევა აღმოიფხვრა დროულად ჩვენი დამკვირვებლის მითითების შედეგად",- განაცხადა ორგანიზაციის სადამკვირვებლო მისიის ხელმძღვანელმა მარი ბენდელიანმა.
მისივე თქმით, ლაგოდეხში საარჩევნო უბნებთან მანკიერი პრაქტიკა კვლავ გრძელდება, რომელიც უბნის მიმდებარედ კოორდინატების ყოფნაში გამოიხატება.