გორში, მშვიდობის გამზირზე, ავტოსაგზაო შემთხვევის შედეგად, დედა-შვილი დაშავდა. ახალგაზრდა ქალი და 9 წლის ბიჭი, სასწრაფო დახმარების ჯგუფმა კლინიკა „გორმედში“ გადაიყვანა.
ექიმების განცხადებით, დაშავებულების სიცოცხლეს საფრთხე არ ემუქრება, თუმცა ამ ეტაპზე კვლავ მიმდინარეობს გამოკვლევების ჩატარება. მცირეწლოვან პაციენტს, რომელსაც თავის ტრავმა აღენიშნება, უტარდება მაღალტექნოლოგიური კვლევები.
„ავარიის შედეგად შემოყვანილია ორი პაციენტი. 9 წლის ბიჭს თავის ტრავმა და თანმდევი ამნეზია აღენიშნება, დედას კი, გულმკერდის და წინა მხრის დაჟეჟილობა. ბავშვი მკურნალობას სტაციონარში გააგრძელებს, პარალელურად, კვლავ მიმდინარეობს მაღალტექნოლოგიური გამოკვლევების ჩატარება“, - განაცხადა „ინტერპრესნიუსთან“ მორიგე ექიმმა ვიტალი სავანელმა.
მომხდარ ფაქტთან დაკავშირებით გამოძიება სსკ-ის 276-ე მუხლით მიმდინარეობს.