მეუფეების განცხადებების, შენიშვნების ანალიზს არ ვაპირებ, მე ერთადერთი რამ შემიძლია გითხრათ - როცა ასეთი ტიპის განცხადებები კეთდება, ისინი არც ერთ შემთხვევაში არ კეთდება გულწრფელი გაბრაზებით ან აღშფოთებით. არ ხდება ხოლმე ასეთი ტიპის განცხადებების კეთება ზურგისა და ამ ზურგის ინტერესების გარეშე, - ამის შესახებ საქართველოს ყოფილმა პრეზიდენტმა გიორგი მარგველაშვილმა საქართველოს პატრიარქთან შეხვედრის შემდეგ განაცხადა.

კითხვაზე, თუ ვის გულისხმობდა „ზურგში“, მარგველაშვილმა განაცხადა, რომ არ იცის. მისივე თქმით, პატრიარქი მხნედ არის.

„მე დავინახე ის თვალები. რომელიც ბოლო 40 წელია მახსოვს ნათელი ადამიანის, რომელსაც ნათელი ხედვა აქვს ხვალინდელი დღის და მტკიცედ დგას შეთითხნილი, მარტივი ინტრიგების ზემოთ. მე დავინახე პატრიარქი, რომელიც ვერ გატეხა ვერც კაგებემ და ვერც სხვა სპეცსამსახურებმა“, - განაცხადა მარგველაშვილმა.

გიორგი მარგველაშვილი საპატრიარქოში დაახლოებით ერთი საათის განმავლობაში იმყოფებოდა.