თორნიკე რიჟვაძე - დარწმუნებული ვარ, ერთობლივი ძალისხმევით, დავძლევთ მნიშვნელოვან გამოწვევებს, რომელიც ჩვენი ქვეყნის ოკუპაციასთან დაკავშირებით გაგვაჩნია

დღეს ბათუმში ,,საქართველოს თავდაცვის და უსაფრთხოების კონფერენცია“ (GDSC) ოფიციალურად გაიხსნა. როგორც „ინტერპრესნიუსს“ აჭარის ავტონომიური რესპუბლიკის მთავრობიდან აცნობეს, კონფერენციის გახსნაში აჭარის მთავრობის თავმჯდომარე თორნიკე რიჟვაძემ მიიღო მონაწილეობა. მე-13 საერთაშორისო კონფერენციის მონაწილეებს სიტყვით მიმართეს საქართველოს პრეზიდენტმა, პარლამენტის თავმჯდომარემ, საქართველოს თავდაცვის მინისტრმა და აჭარის მთავრობის თავმჯდომარემ. თორნიკე რიჟვაძემ ქვეყანაში და რეგიონში კონფერენციის ჩატარების მნიშვნელობაზე გაამახვილა ყურადღება.

,,თავდაცვისა და უსაფრთხოების კონფერენცია წლებია მნიშვნელოვანი პლატფორმაა რეგიონალური, გლობალური უსაფრთხოების და თავდაცვის კუთხით. დარწმუნებული ვარ, რომ ერთობლივი ძალისხმევით ჩვენს პარტნიორებთან ერთად დავძლევთ მნიშვნელოვან გამოწვევებს, რომელიც გაგვაჩნია ჩვენი ქვეყნის ოკუპაციასთან დაკავშირებით.

მოხარული ვარ, რომ ასეთი მნიშვნელოვანი კონფერენცია იმართება ბათუმში, რომელიც გახლავთ ერთ-ერთი ყველაზე მნიშვნელოვანი ტურისტული, ლოჯისტიკური და ეკონომიკური ცენტრი აღმოსავლეთის და დასავლეთის გზაჯვარედინზე, სამხრეთს და ჩრდილოეთს შორის'', - განაცხადა თორნიკე რიჟვაძემ.

ბოლო 13 წლის განმავლობაში „საქართველოს თავდაცვისა და უსაფრთხოების კონფერენცია“ რეგიონში უნიკალურ ფორუმად ჩამოყალიბდა, სადაც ევრო-ატლანტიკური უსაფრთხოებისა და რეგიონული სტაბილურობის წინაშე მდგარი გამოწვევები განიხილება.

კონფერენცია აერთიანებს გადაწყვეტილების მიმღებ პირებს, ექსპერტებსა და სამოქალაქო საზოგადოების წარმომადგენლებს, რომლებიც უსაფრთხოების გარემოს წინაშე მდგარ გამოწვევებთან დაკავშირებით ერთმანეთს ხედვებს გაუზიარებენ.

კონფერენციაში ნატო-ს გენერალური მდივნის მოადგილე, ქართველი და უცხოელი პოლიტიკოსები, თავდაცვისა და უსაფრთხოების სფეროს ექსპერტები, სამოქალაქო საზოგადოების, მედიისა და აკადემიური წრეების წარმომადგენლები მონაწილეობენ.

რიგით მე-13 „საქართველოს თავდაცვის და უსაფრთხოების კონფერენცია“ (GDSC) 7 ნოემბერს დასრულდება.

მაია ბითაძე - ევროპამ 50 წლით გაგვისწრო, მაგრამ ნაბიჯ-ნაბიჯ ჩვენც მივყვებით
ქართული პრესის მიმოხილვა 12.11.2019
ვახტანგ ძაბირაძე - ოპოზიციაში არ ჩანს ოპოზიციური ძალა, რომელიც ოპოზიციურად განწყობილი პოლიტიკური ძალებისა და ელექტორატის ლიდერი გახდებოდა
„სამ რაან სპა-ცენტრი“ ევროპის საუკეთესო სპად დასახელდა