გარდაბნის თბოელექტროსადგურის მე-3 და მე-4 ბლოკის 200-მდე თანამშრომელი მესამე დღეა გაფიცულია. გაფიცული მუშები, დილიდან „თბილსრესის" ტერიტორიაზე შეიკრიბნენ. აქციის მონაწილეები ხელფასების 50%-ით გაზრდას, პრემია-დანამატებსა და შრომითი უსაფრთხოების ნორმების გაუმჯობესებას მოითხოვენ.
აქციის მონაწილეებსა და ადმინისტრაციას შორის გუშინ მოლაპარაკებები უშედეგოდ დასრულდა. „თბილსრესის" ხელმძღვანელობამ მათ ხელფასების 15-20%-ით გაზრდა შესთავაზა, რასაც მუშები არ დათანხმდნენ. „თბილსრესის" ტერიტორიაზე შეკრებილები აცხადებენ, რომ თუ მათი მოთხოვნა არ შესრულდა, აქციებს გააგრძელებენ და პროტესტის ნიშნად ცენტრალურ გზას გადაკეტავენ.