საქართველოში ვიზიტით მყოფი ამერიკელი კონგრესმენები სოფელ ოძისს ეწვივნენ

აშშ-ს კონგრესში საქართველოს მხარდამჭერი ჯგუფის თანათავმჯდომარე რესპუბლიკელი კონგრესმენი ადამ კინზინგერი და კონგრესმენი ალექს მუნი, საქართველოში ვიზიტის ფარგლებში საოკუპაციო ხაზთან მდებარე სოფელ ოძისს ეწვივნენ.

საქართველოს საგარეო საქმეთა სამინისტროს ინფორმაციით, ამერიკელ კონგრესმენებს თან ახლდათ საქართველოს საგარეო საქმეთა სამინისტროს წარმომადგენლები და აშშ-ში საქართველოს საგანგებო და სრულუფლებიანი დესპანი გიორგი ციკოლია.

კონგრესმენებმა ამომწურავი ინფორმაცია მიიღეს ოკუპირებულ ტერიტორიებზე არსებულ ვითარებასთან დაკავშირებით, ასევე იმ პრობლემებზე, რაც ადგილობრივ მოსახლეობას ოკუპაციის შედეგად ექმნება. მათ კიდევ ერთხელ დააფიქსირეს აშშ-ს მტკიცე მხარდაჭერა საქართველოს სუვერენიტეტისა და ტერიტორიული მთლიანობის მიმართ და ასევე დაგმეს საოკუპაციო რეჟიმის ქმედებები ადგილზე, რაც მძიმე ჰუმანიტრაულ შედეგებს იწვევს.

„ეს სიტუაცია ნამდვილად ნათლად წარმოაჩენს, თუ რამდენად უკანონოა აქ განვითარებული პროცესები, თუ რამდენად ცუდი მოთამაშეა რუსეთი. ეს ყველაფერი კიდევ ერთხელ წარმოაჩენს უდიდეს განსხვავებას დასავლურ სამყაროსთან, რომელიც ხელს უწყობს თავისუფლებას, ისევე როგორც საქართველო, და რუსეთს შორის, რომელიც ზღუდავს ადამიანების გადაადგილებას საკუთარი ქვეყნის ტერიტორიაზე. ეს არის არასწორი, უკანონო და აშშ არასდროს შეეგუება ამას. მოქალაქეებისთვის საქართველოს ტერიტორიაზე თავისუფალი გადაადგილების უფლების წართმევა არის უკანონო. რაც შეეხება ამ პრობლემის გადაჭრას, უკვე შედგა შეხვედრები და განხილვები, თუმცა უფრო მნიშვნელოვანია მკაფიოდ დაფიქსირდეს ის, რომ საქართველო არის აშშ-ს მოკავშირე და აუცილებელია უახლოეს პერიოდში საქართველო გახდეს ნატოს წევრი“, - აღნიშნა კონგრესმენმა კინზინგერმა.

კონგრესმენებმა საქართველოში ვიზიტის ფარგლებში ასევე დაათვალიერეს ქართული სამხედრო სარეაბილიტაციო ცენტრიც. „ჩვენ ახლახანს დავტოვეთ ქართული სამხედრო სარეაბილიტაციო ცენტრი და მე, როგორც სამხედრო მსახურს, მსურს ვთქვა, რომ ის კიდევ ერთხელ გვახსენებს ქართველი ერისა და სამხედროების სულისკვეთებას. ჩვენ ამაყნი ვართ, რომ შეგვიძლია დაგეხმაროთ ამ პრობლემის გადაჭრაში“, - აღნიშნა კინზინგერმა.

ცნობისთვის, აშშ-ს კონგრესმენები საქართველოს 5-9 ნოემბერს სტუმრობენ, ვიზიტის ფარგლებში კონგრესმენებს შეხვედრა ჰქონდათ საქართველოს აღმასრულებელ და საკანონმდებლო ხელისუფლების წარმომადგენლებთან. ვიზიტის ფარგლებში, ამერიკელმა კონგრესმენებმა მონაწილეობა მიიღეს ბათუმში თავდაცვისა და უსაფრთხოების კონფერენციაში და ეწვივნენ ფოთის პორტს.​

გია ხუხაშვილი - თუ პროპორციულ არჩევნებში ხელისუფლებამ ვერ მოახერხა 40%-იანი ბარიერის გადალახვა, ხელისუფლებას მეორე ტურში შეიძლება შეექმნას სერიოზული პრობლემა
ქართული პრესის მიმოხილვა 17.09.2020
ზვიად კირტავა -  ახლა, როცა ვირუსს უკეთ ვიცნობთ, შეიძლება უფრო წერტილოვანი, ხანმოკლე და ლოკალური შეზღუდვების იმედად ვიყოთ
რან გიდორი - სწრაფვა მშვიდობისკენ კორონავირუსის დასამარცხებლად
"მემარცხენე ალიანსის" ლიდერი კახა ძაგანია - "ვხსნით ჩვენს პარტიას რეგისტრაციიდან და ვუერთდებით "პატრიოტთა ალიანსს"
ირმა ინაშვილი - ჩვენთან მიმართებაში გამოცხადებულია საინფორმაციო ბლოკადა
წინანდლის მამული რიგით მეორე მუსიკალურ ფესტივალს მასპინძლობს
წინანდლის მუზეუმს შარლ დე გოლის წერილები გადაეცა